हिंगोली; पुढारी वृत्तसेवा : जिल्हा पोलीस अधीक्षक जी श्रीधर यांनी विशेष मोहीम राबवून हिंगोली जिल्ह्यातील लपून छपून चालणाऱ्या अवैध धंद्यावर कार्यवाही करण्याच्या सूचना स्थानिक गुन्हे शाखेला दिल्या होत्या. त्यानुसार कापडसिंगी येथे एका जुगार अड्ड्यावर पोलिसांनी छापा मारला. या छापेमारीत एकूण दोन लाखांचा मुद्देमाल जप्त करण्यात आला.
पोलीस पथक कार्यवाही करीत असताना मिळालेल्या माहितीनुसार, पोलीस स्टेशन सेनगाव हद्दीतील कापडसिंगी येथे लायसन क्लबच्या नावाखाली जुगार चालू आहे, अशी माहिती पोलीस निरीक्षक पंडित कच्छवे यांना मिळाली. त्यांच्या मार्गदर्शनाखाली स्थानिक गुन्हे शाखेचे सहाय्यक पोलीस निरीक्षक एस एस घेवारे यांच्या पथकाने (दि. २०) रोजी कापडसिंग येथील दशरथ साबळे यांच्या रोड लगत असलेल्या पत्र्याच्या शेडलगत छापा मारला. या ठिकाणी लायसन क्लबच्या नावाखाली जुगार खेळणाऱ्या काही व्यक्ती आढळून आल्या. दशरथ तुकाराम साबळे (वय ५४ वर्ष), संतोष गोरोबा चव्हाण (वय ५०वर्ष), अनिल श्रीरंग आडे (वय ३५ वर्ष), बाबाराव श्रीरंग चव्हाण (वय ४० वर्ष), राजू उकंडी चिभडे (वय २५ वर्ष) सर्व रा. कापडसिंगी, तर गोविंद काशिनाथ राठोड (वय ५२ वर्ष रा डोंगरगाव), दत्तराव यमाजी वाकळे (वय ५० वर्ष), विजय उत्तम राठोड (वय ३८ वर्ष, रा डोंगरगाव), कोंडीराम विठ्ठल बिजुले (वय ४० वर्ष रा. डोंगरगाव) हे ९ जण झन्नामन्ना नावाचा जुगार खेळताना दिसून आले. या सर्वांना ताब्यात घेऊन त्यांच्याकडील रोख रक्कम मोटार सायकल व मोबाईल असा २ लाख ७१ हजार २०० रुपयांचा मुद्देमाल जप्त करून पोलीस स्टेशन सेनगाव येथे गुन्हा दाखल करण्यात आलेला आहे.
सदरची कार्यवाही पोलीस अधीक्षक श्री जी श्रीधर, अपर पोलीस अधीक्षक श्रीमती अर्चना पाटील, पोलीस निरीक्षक श्री पंडित कच्छवे यांच्या मार्गदर्शनाखाली स्थागुशाचे सपोनि शिवसांब घेवारे, पोलीस अंमलदार गजानन पोकळे, किशोर कातकडे, विठ्ठल काळे, ज्ञानेश्वर पायघन, हरिभाऊ गुंजकर यांच्या पथकाने केली आहे
