कोल्हापूर : शहरासह जिल्ह्याला वादळी पावसाने शुक्रवारी झोडपून काढले. दिवसभर उन्हाचा तडाखा जाणवत होता. सायंकाळनंतर अचानक नभ दाटून आले आणि सोसाट्याचा वारा सुटला. काही वेळातच विजांच्या कडकडाटासह शहरात पावसाने जोरदार हजेरी लावली. शहरात तीन ठिकाणी वीज कोसळल्याने नारळाच्या झाडांना आग लागली. जिल्ह्याच्या ग्रामीण भागातही जोरदार पावसासह गारांचा वर्षाव झाला. दरम्यान, जिल्ह्यात गुरुवारपर्यंत पावसाची शक्यता असून, हवामान विभागाने सोमवारी व मंगळवारी ‘यलो अलर्ट’ दिला आहे. राधानगरी, गगनबावडा, पन्हाळा, करवीर, शाहूवाडीसह अन्य तालुक्यांत पावसासह गारांचा वर्षाव झाला.
येथे कोसळली वीज...
फुलेवाडी दुसरा बसस्टॉपजवळील नारळाच्या झाडावर वीज कोसळल्याने झाडाने पेट घेतला. याशिवाय लिंगम कॉलनी संभाजीनगर येथेही नारळाच्या झाडावर वीज कोसळली. जयंती नाला पंपिंग हाऊसजवळ वीज कोसळल्याने कचरा आणि परिसरात ठेवलेल्या वायरने पेट घेतला. मरळी (ता. पन्हाळा) येथेदेखील नारळाच्या झाडावर वीज कोसळली.
