मुरगूड : ‘टीईटी’ पेपरफुटी प्रकरणातील 21 वा आरोपी अविनाश पांडुरंग कणसे (रा. शेणोली, ता. कराड, जि. सातारा) यास सोमवारी कराड येथून अटक करण्यात आली. कागल प्रथमवर्ग न्यायालयाने त्यास तीन दिवसांची पोलिस कोठडी दिली. या प्रकरणातील आरोपींची संख्या 26 आहे, त्यापैकी 20 आरोपींना यापूर्वी अटक झाली आहे.
या प्रकरणाचे थेट कनेक्शन बिहार असल्याचे समजते. बिहारमधील रितेश व हुसेन हे प्रमुख दोन आरोपी असून, पोलिस पथके त्यांच्या शोधात आहेत. तर या प्रकरणाचे उपकेंद्र कराड असून, कराडचा महेश गायकवाड या प्रकरणाचा म्होरक्या आहे, तर त्याचा भाऊ संदीप गायकवाड हा प्रमुख आरोपी आहे. दरम्यान, आज अटक केलेल्या अविनाश कणसे यास दि 3 डिसेंबरपर्यंत पोलिस कोठडी मिळाली. या प्रकरणाच्या तपासासंदर्भात माहिती घेण्यासाठी अतिरिक्त जिल्हा पोलिसप्रमुख डॉ. बी. धीरजकुमार यांनी मुरगूड पोलिस ठाण्याला भेट दिली व माहिती घेतली.
