कोल्हापूर : जागतिक वसुंधरा दिनाच्या पूर्वसंध्येला जगातल्या महत्त्वाच्या बिल्डिंग हिरव्या प्रकाशात झळकल्या. त्यांची यादी ऑफिशियल अर्थ डे यांनी लिंक इन वर छायाचित्रासह पोस्ट केली आहे. यात शिवाजी विद्यापीठाच्या इमारतीचा समावेश आहे. विद्यापीठाच्या इमारतीला जगातील महत्त्वाच्या बिल्डिंगच्या यादीत स्थान मिळाल्याने विद्यापीठाच्या शिरपेचात मानाचा तुरा रोवला आहे.
जागतिक वसुंधरा दिनानिमित्त देशासह जगभरातील इमारतीवर हिरव्या रंगाच्या आकर्षक रोषणाई करण्यात आली होती. याचे छायाचित्र मंगळवारी प्रसिद्ध झाले होते. याची दखल ‘अर्थ डे’ या जागतिक स्तरावरील संस्थेने घेतली.
विशेष म्हणजे ‘अर्थ डे’वर जगातील नऊ इमारती झळकल्या आहेत. यात महाराष्ट्रातील छत्रपती शिवाजी महाराज टर्मिनस व शिवाजी विद्यापीठ इमारतीचा समावेश आहे. शांघाय येथील मार्सीडेज बेन्झ अरीना, मुंबई येथील छत्रपती शिवाजी महाराज टर्मिनस, पोर्तुगल येथील सेंचुरी ऑफ ख्रिस्त द किंग, न्यूयॉर्क येथील वन वर्ल्ड ट्रेड सेंटर, दिल्ली येथील सेंट जेम्स चर्च, पोलंड येथील वर्सोवा, कराची येथील फ—ेअरे हॉल, स्कॉटलंड येथील ओ वो हायड्रो अरीना व कोल्हापूर येथील शिवाजी विद्यापीठ इमारत अशा जगातील नऊ इमारतींचा यात समावेश आहे.
