मुरगड : पालकमंत्री हसन मुश्रीफ यांनी गावोगावी वाटलेल्या विकासगंगा पुस्तकात माजी खासदार प्रा. संजय मंडलिक यांनी मंजूर केलेल्या विकासकामांचेही श्रेय मुश्रीफ यांनी घेतले. स्वर्गीय सदाशिवराव मंडलिक यांनी प्रा. मंडलिक यांना बाजूला ठेवून मुश्रीफांना संधी दिली. त्यांना मंत्रिपदासह विविध सत्ता दिल्या. त्याच मुश्रीफांनी प्रा. मंडलिक यांच्या निधीबरोबरच त्यांचे राजकीय करिअरही चोरल्याची खोचक टीका मविआचे उमेदवार समरजितसिंह घाटगे यांनी केली. कुरणी (ता. कागल) येथे आयोजित जाहीर सभेत ते बोलत होते.
समरजितसिंह घाटगे म्हणाले, ‘हमीदवाडा’च्या निवडणुकीत दिवंगत सदाशिव मंडलिक यांना मुश्रीफ यांनी दिलेला त्रास स्वाभिमानी जनता विसरलेली नाही. स्वर्गीय मंडलिक म्हणाले होते, मुश्रीफ नावाच्या राक्षसाला मीच गाडणार. त्यांचे हे अपूर्ण स्वप्न या निवडणुकीत कागलची स्वाभिमानी जनता छत्रपती शिवाजी महाराजांच्या गनिमी काव्याने पूर्ण केल्याशिवाय स्वस्थ बसणार नाही. बिद्री कारखान्याचे माजी उपाध्यक्ष बाबासाहेब पाटील म्हणाले, मुश्रीफांनी विकास केला तो ठरावीक लोकांचा. त्यांच्याकडील ठरावीक नेते आणि लोक पैसे मिळवण्याचे काम करत आहेत. मुश्रीफांना लोकशाही काय, हे दाखवण्यासाठी त्यांना पराभूत करूया.
सागर कोंडेकर म्हणाले, पालकमंत्री मुश्रीफ यांनी स्वतःच्या स्वार्थासाठी जनतेला, शेतकर्यांना, बेरोजगारांना, महिलांना, युवतींना, तरुणांना फसवले. अशा दलबदलू, सत्तापिपासू मुश्रीफांना धडा शिकवल्याशिवाय शांत बसायचं नाही. प्रास्ताविक सागर पाटील यांनी केले. यावेळी शिवानंद माळी, संकेत देशमुख, एकनाथ देशमुख, शिवाजी कांबळे, संभाजी भोकरे यांनी मनोगत व्यक्त केले. दत्तामामा खराडे, लक्ष्मण जात्राटे, विनोद पाटील, किसन पाटील, भाऊसो पाटील, आनंदा थोरवत, शामराव मांगोरे, तातोबा कांबळे, रणजीत कांबळे उपस्थित होते. आभार प्रकाश पारटे यांनी मानले.
