कोल्हापूर : सह्याद्री व्याघ प्रकल्पात आता ‘तारा’ची डरकाळी घुमणार आहे. ताडोबा-अंधारी व्याघ प्रकल्पातील चंदा वाघीण एक हजार कि.मी.चा 27 तासांचा प्रवास करत शुक्रवारी पहाटे चांदोलीत (जि. सांगली) दाखल झाली. तिला सोनार्ली येथील ‘एनक्लोजर’मध्ये सोडण्यात आले. याकरिता राबविण्यात आलेले ‘ऑपरेशन तारा’ फत्ते झाले असून लवकरच आणखी सात वाघ आणण्यात येणार आहेत.
सह्याद्री व्याघ प्रकल्पात आठ वाघ आणण्यात येणार आहेत. ते ताडोबा-अंधारी व्याघ प्रकल्प आणि पेंच व्याघ प्रकल्पातून स्थानांतरित करण्यास केंद्र शासनाच्या पर्यावरण, वन आणि हवामान बदल मंत्रालयाने मंजुरी दिली आहे. त्यानुसार तीन नर आणि पाच मादी असे आठ वाघ आणण्यात येणार असून ‘ऑपरेशन तारा’अंतर्गत ताडोबातील चंदा वाघीण सह्याद्री व्याघ प्रकल्पात आणण्यात आली. ‘चंदा’चे सह्याद्री व्याघ प्रकल्पात आता ‘तारा’असे नामकरण केले असून तिला ‘एसटीआरटी 04’ असा सांकेतिक क्रमांकही देण्यात आला आहे. भारतीय वन्यजीव संस्था (डब्ल्यूआयआय) यांच्या मार्गदर्शनाखाली सुरक्षिततेचे सर्व मानदंड वापरून स्थानांतराची ही मोहीम राबविण्यात आली.
चंद्रपूर येथील वन्यजीव पशुवैद्यकीय अधिकारी डॉ. आर. एस. खोबागडे यांनी या मोहिमेचे नेतृत्व केले. बुधवारी (दि. 12) ताडोबा येथून रात्री दहा वाजता तिचा प्रवास सुरू झाला. शुक्रवारी रात्री दीड वाजता या वाघिणीला घेऊन पथक चांदोली येथे दाखल झाले. तपासण्यानंतर रात्री 3 वाजून 20 मिनिटांनी तिला ‘एनक्लोजर’मध्ये सोडले. व्याघ प्रकल्पाचे क्षेत्र संचालक तुषार चव्हाण, विभागीय वन अधिकारी स्नेहलता पाटील, सहायक वन संरक्षक संदेश पाटील, बाबासाहेब हाके, चांदोली वन क्षेत्रपाल ऋषीकेश पाटील, आंबा वन क्षेत्रपाल प्रदीप कोकीतकर, ढेबेवाडीचे वन क्षेत्रपाल किरण माने, संग््रााम गोडसे, मानद वन्यजीव रक्षक रोहन भाटे, आकाश पाटील यांनी या मोहिमेत सहभाग घेतला.
