कोल्हापूर ः वर्षअखेरीस कोल्हापूरकरांसाठी आनंदाची पर्वणी घेऊन येणार्या ‘पुढारी कोल्हापूर कार्निव्हल 2024’ ची प्रतीक्षा अखेर संपणार असून, खरेदी, खाद्य आणि मनोरंजनाची मेजवानी ठरणार्या या कार्निव्हलचा शुभारंभ गुरुवारी (दि. 26) होणार आहे. कार्निव्हलचे उद्घाटन कोल्हापूर जिल्हा परिषदेचे मुख्य कार्यकारी अधिकारी कार्तिकेयन एस. यांच्या हस्ते होणार आहे. यावेळी तोडकर संजीवनी निसर्गोपचार केंद्राचे संचालक स्वागत तोडकर, रॉनिक स्मार्ट वॉटर हीटरचे तानाजी पवार, आणि क्रेझी आईस्क्रीमचे मार्केटिंग मॅनेजर प्रशांत पाटील हे उपस्थित राहणार आहेत.
या वर्षीच्या ‘शॉपिंग आणि फूड फेस्टिव्हल’चे कार्निव्हल स्वरूपात आयोजन करण्यात आले आहे. यामध्ये रंगीबेरंगी मुखवटे, मनमोहक रोषणाई आणि आकर्षक सजावट यामुळे हा कार्निव्हल कोल्हापूरकरांसाठी अविस्मरणीय भेट ठरणार आहे. ‘सन मराठी’ हे कार्यक्रमाचे एंटरटेन्मेंट पार्टनर असून, हेल्थ पार्टनर ‘तोडकर संजीवनी निसर्गोपचार केंद्र’ आणि सह प्रायोजक ‘रॉनिक स्मार्ट’ तर आईस्क्रीम पार्टनर ‘क्रेझी आईस्क्रीम’ आहेत. दि.26 ते दि.30 डिसेंबर या कालावधीत होणार्या या कार्निव्हलमध्ये खरेदी, खाद्यपदार्थ, आणि मनोरंजनाचा संगम अनुभवता येणार आहे. कार्निव्हलमध्ये 130 हून अधिक स्टॉल्स असून, त्यामध्ये इलेक्ट्रॉनिक्स, गारमेंटस, फर्निचर, किचन वेअर, दागिने, सौंदर्य प्रसाधने यांसारख्या विविध ग्राहकोपयोगी वस्तू उपलब्ध आहेत. याशिवाय, चारचाकी आणि दुचाकी वाहनांसाठी स्वतंत्र विभाग असून, ग्राहकांना टेस्ट ड्राईव्हची सोय तसेच स्पॉट बुकिंगवर विशेष ऑफर्स देण्यात येणार आहेत.
कार्निव्हलमध्ये खवय्यांसाठी चविष्ट खाद्यपदार्थांची रेलचेल असणार आहे. कोल्हापुरी तांबडा-पांढरा, मांसाहारी आणि शाकाहारी पदार्थ, चौपाटीवरील खास स्ट्रीट फूड, फास्टफूड प्रकार आणि पारंपरिक स्वाद यांचा आस्वाद घेण्याची उत्तम संधी मिळणार आहे. पहिल्या दिवशी म्हणजे गुरुवार (दि. 26) रोजी बोल बच्चनचे ‘बोलबच्चन’ हा धमाल किस्से आणि विनोदाचा कार्यक्रम आयोजित करण्यात आला आहे. कार्निव्हलमध्ये रोज सायंकाळी कराओके, लावणी लाईव्ह ऑर्केस्ट्रा आणि डीजे नाईटची धमाल असणार आहे. लहान मुलांसाठी खास अॅम्युझमेंट पार्क आणि विविध खेळांच्या सुविधा उपलब्ध असतील, त्यामुळे हा कार्निव्हल संपूर्ण कुटुंबासाठी मनोरंजनाची पर्वणी ठरणार आहे.
‘पुढारी कोल्हापूर कार्निव्हल 2024’ या खरेदीच्या उत्सवात चविष्ट खाद्यपदार्थ आणि धमाकेदार मनोरंजनाचा अनुभव घेण्यासाठी आपल्या कुटुंबासह या कार्निव्हलला उपस्थित राहा आणि या खरेदी उत्सवाचा आनंद घ्या, असे आवाहन दै. ‘पुढारी’च्या वतीने करण्यात येत आहे.
अधिक माहितीसाठी : 9834433274
