कुरुंदवाड : कवठेगुलंद (ता. शिरोळ) येथील केटगाळे मळा परिसरात सुरू असलेल्या बेकायदेशीर जुगार अड्ड्यावर कुरुंदवाड पोलिसांनी छापा टाकत साखर कारखान्यातील कामगारांसह पाच जणांविरोधात गुन्हा दाखल केला. या कारवाईत रोख रक्कम, पत्त्यांचा संच व चार मोटरसायकली असा एकूण २ लाख ६२ हजार ५०० रुपयांचा मुद्देमाल जप्त करण्यात आला.
गुरुवारी सायंकाळी साडेसहा वाजण्याच्या सुमारास कवठेगुलंद ते शेडशाळ रोडलगत असलेल्या केटगाळे मळ्यात पैसे लावून तीन पानी जुगार खेळताना गणेश चंद्रकांत केटगाळे (वय ४८), चंद्रकांत धनपाल जगताप (वय ४३), अजम कमाल मलंगफकीर (वय ६०), श्रीकांत अर्जुन महाडीक (वय ४२) व नितीन विनायक कांबळे (वय २६, सर्व रा. कवठेगुलंद, ता. शिरोळ) यांना पैसे लावून जुगार खेळताना रंगेहात पकडण्यात आले.
संबंधितांपैकी काहीजण साखर कारखान्यातील कामगार असल्याचेही पोलिस तपासात पुढे आले आहे. छाप्यात साडेसात हजार रुपये रोख रक्कम, चार मोटरसायकली असा 2 लाख, 62 हजार, 500 रुपयांचा मुद्देमाल जप्त करण्यात आला आहे.
