कोल्हापूर : जादा परतावा देण्याचे आमिष दाखवून सुमारे तीन कोटींची फसवणूक केल्याप्रकरणी आर्थिक गुन्हे अन्वेषण शाखेच्या पोलिसांनी दोघांना अटक केली. श्रीमंता बझार प्रा. लि. कंपनीचा प्रमुख आणि गुन्ह्याचा मुख्य सूत्रधार श्रीकांत होळेहुन्नुर रामचार (वय 62, रा. शुक्रवार पेठ, पुणे) व कंपनीचा अकौंटंट दिनेश योगेश भटनागर (54, रा. गाझियाबाद, मध्य प्रदेश) अशी त्यांची नावे आहेत.
35 हजार गुंतविल्यास अडीच महिन्यांत 54 हजार रुपये परतावा देण्याचे आमिष दाखवून श्रीमंता बझार या कंपनीने तीन कोटींची फसवणूक केल्याचा गुन्हा गेल्या महिन्यात गडहिंग्लज पोलिस ठाण्यात दाखल करण्यात आला आहे. याप्रकरणी 11 जणांवर गुन्हा दाखल झाला आहे. त्यापैकी अमोल बाळू चौगुले (वय 42, रा. चिमगाव, ता. कागल) याला अटक झाली असून इतरांचा शोध सुरू होता. गुन्ह्यातील म्होरक्या श्रीकांत रामचार, अकौंटंट दिनेश भटनागर हे दुसर्या एका गुन्ह्यात पुण्यातील येरवडा कारागृहात असल्याची माहिती पोलिसांना मिळाली होती. त्यानुसार पुणे जिल्हा न्यायालयास पत्रव्यवहार करून दोन्ही आरोपींचा ताबा घेण्यात आला.
अटकेची प्रक्रिया करून त्यांना बुधवारी गडहिंग्लज येथील न्यायालयात हजर करण्यात आले. त्यांना पोलिस कोठडीत ठेवण्याचे आदेश न्यायालयाने दिले. दरम्यान, या गुन्ह्यातील रणजित राजाराम रावण (वय 42, रा. मुरगूड, ता. कागल), वैशाली गुरव (रा. हलकर्णी, ता. गडहिंग्लज), सदाशिव दत्तात्रय चव्हाण (67, रा. पिंपळगाव, ता. भुदरगड), संतोष शिवाजी भोसले (34, रा. औरनाळ, ता. गडहिंग्लज), तुषार सुरेश चोथे (38, रा. गडहिंग्लज), धर्मेंद्र सिंगर (रा. बुदनी, जि. सिहोर, मध्य प्रदेश), विठ्ठल मारुती जाधव (52, रा. भीमनगर, गडहिंग्लज), रमेश शिरगावे (रा. हेब्बाळ, ता. गडहिंग्लज) यांचा शोध सुरू असल्याची माहिती पोलिसांनी दिली.
