कोल्हापूर : सार्वजनिक गणेशमूर्ती विसर्जनासाठी महापालिकेची संपूर्ण यंत्रणा सज्ज ठेवण्यात आली आहे. विसर्जन मार्गावरील धोकादायक इमारतीभोवती बॅरिकेडस् उभारून सूचना फलक लावण्यात आले असून, नागरिकांनी या इमारतींमध्ये प्रवेश न करण्याचे आवाहन महानगरपालिकेच्या वतीने करण्यात आले आहे.
पावसाने विश्रांती दिल्याने विसर्जन मार्गावरील खड्ड्यांवर युद्धपातळीवर डांबरी पॅचवर्क सुरू आहे. इराणी खण व विसर्जन मार्गावर सीसीटीव्ही बसविण्यात आले असून, पोलिस प्रशासनाने निश्चित केलेल्या मार्गांवर बॅरिकेडस्, वॉच टॉवर आणि प्रकाशयोजना करण्यात आली आहे. मिरवणूक मार्गावर फांद्यांंची छाटणी, अडथळे व अतिक्रमण हटविण्याचे काम पूर्ण करण्यात आले आहे. सार्वजनिक गणेशमूर्ती विसर्जनासाठी इराणी खण येथे चार क्रेन आणि दहा फ्लोटिंग तराफे उपलब्ध करून देण्यात आले आहेत. विसर्जन व्यवस्थापनासाठी पवडी, आरोग्य, उद्यान आदी विभागांतील सुमारे तीन हजार कर्मचारी नियुक्त असून, 100 टेम्पो, 415 हमाल, 5 जेसीबी, 7 डंपर, 4 पाणी टँकर, 2 बूम, 6 अॅम्ब्युलन्ससह इतर यंत्रणा सज्ज ठेवण्यात आली आहे.
आरोग्य विभागाकडून विसर्जन मार्ग व स्थळांवर साफसफाईसाठी कर्मचारी व वैद्यकीय पथके नेमण्यात आली आहेत. अर्पण केलेल्या मूर्ती व निर्माल्य इराणी खणीमध्ये पोहोचविण्यासाठी स्वतंत्र वाहतूक व्यवस्था उपलब्ध करून देण्यात आली आहे. नागरिकांच्या मदतीसाठी 0231-2545473, 2542601 हे दूरध्वनी क्रमांक शासनाने कार्यान्वित केले आहेत. शनिवार, दि. 6 सप्टेंबर रोजी अनंत चतुर्दशीच्या दिवशी विसर्जन मिरवणुकीत सहभागी होणार्या सार्वजनिक संस्था, तरुण मंडळे व तालीम संस्थांच्या अध्यक्षांचे महापालिकेच्या वतीने स्वागत करण्यात येणार आहे. तसेच हॉकी स्टेडियम येथे पर्यायी विसर्जन मार्गावरही स्वागत कक्ष उभारण्यात आला आहे. या ठिकाणी प्रशासनाकडून श्रीफळ, पान, सुपारी व एक रोप देऊन मंडळांचा गौरव करण्यात येणार आहे. मूर्ती विसर्जन स्थळावर अग्निशमन दल व सुरक्षा रक्षकांची नियुक्ती केली असून सर्व मंडळांनी पर्यावरणपूरक मूर्तींचे विसर्जन इराणी खणीमध्येच करण्याचे आवाहन महापालिका प्रशासक के. मंजुलक्ष्मी यांनी केले आहे.
