कोल्हापूर : महाराष्ट्र-गोवा बार कौन्सिल निवडणूक प्रक्रिया सुरू झाली आहे. आज, शुक्रवार (दि.20) पासून उमेदवारी अर्ज दाखल होणार आहेत. बार कौन्सिल सदस्य पदाच्या 25 जागांसाठी 24 मार्चला होणाऱ्या निवडणुकीत महाराष्ट्र-गोवा येथील 1 लाख 90 हजार वकील मतदानाचा हक्क बजावणार आहेत. बार कौन्सिलच्या निवडणुकीसाठी कोल्हापूर जिल्ह्यातून रस्सीखेच सुरू असून, दोन महिलांसह सहा ज्येष्ठ विधीतज्ञांची तयारी सुरू झाली आहे.
कोल्हापूर जिल्ह्यातून महाराष्ट्र- गोवा बार कौन्सिलसाठी विद्यमान सदस्य ॲड. विवेक घाटगे, कोल्हापूर जिल्हा बार कौन्सिलचे माजी अध्यक्ष ॲड. रणजित गावडे, ॲड. अजितराव मोहिते, ॲड. सर्जेराव खोत, महिला प्रतिनिधीपदासाठी शैलजा चव्हाण व धनश्री चव्हाण इच्छुक आहेत. इच्छुकांनी कोल्हापूर, सांगली, सातारा, सोलापूर, रत्नागिरी, सिंधुदुर्गसह राज्यातील तसेच गोवा येथील वकील मतदार यांच्याशी प्रत्यक्ष संपर्क साधण्यावर भर दिला आहे. महाराष्ट्र-गोवा बार कौन्सिलसाठी कोल्हापूर जिल्ह्यातून 5800, सांगली-4500, सातारा-3500, रत्नागिरी-1200, सिंधुदुर्ग-1400, सोलापूर-2800 सह दोन्ही राज्यांतील 1 लाख 90 हजार वकील मतदानाचा हक्क बजावणार आहेत. मुंबईतील महाराष्ट्र-गोवा बार कौन्सिलच्या मुख्यालयात शुक्रवारपासून दि. 26 फेबुवारीपर्यंत उमेदवारी अर्ज दाखल करता येणार आहे.
