कोल्हापूर : सातवे पैकी शिंदेवाडी (ता. पन्हाळा) येथे मका पिकाची पाहणी करण्यासाठी शेतात गेलेल्या तरुणावर बिबट्याने हल्ला केला. रविवारी सायंकाळी साडेपाचच्या सुमारास झालेल्या या घटनेत रितेश जयवंत शिंदे (22) हा तरुण गंभीर जखमी झाला. त्याच्यावर सीपीआरमध्ये उपचार सुरू आहेत.
शेतात पिकाची पाहणी करत असताना अचानक समोर आलेल्या बिबट्याने रितेशवर झडप घातली. त्याच्या चेहऱ्यावर पंजाने फटका मारला. त्यात रितेशला कानाजवळ गंभीर जखम झाली. मोठ्या प्रमाणात रक्तस्राव झाल्याने रितेश जागेवर कोसळला. त्याला ग््राामस्थानी उपचारासाठी सीपीआरमध्ये दाखल केले. दरम्यान वनरक्षक संदीप पाटील यांनी घटनास्थळी धाव घेतली. वनविभागाकडून परिसरात बिबट्याचा शोध सुरू केला. या प्रकाराने शिंदेवाडीसह परिसरात शेतकऱ्यांत भीतीचे वातावरण पसरले आहे.
