Vishalgad Forest Trap Cameras
विशाळगड : ऐतिहासिक विशाळगडच्या घनदाट जंगलातील जैवविविधतेचे रक्षण करण्यासाठी वन विभागाने आता तंत्रज्ञानाचे आधुनिक कवच चढवले आहे. वन्यजीवांची चोरटी शिकार आणि उन्हाळ्यात लागणारे वणवे यांसारख्या संकटांना थोपवण्यासाठी पेंढाखळे वनपरिक्षेत्रात ठिकठिकाणी 'ट्रॅप कॅमेरे' बसवून 'डिजिटल निगराणी' सुरू करण्यात आली आहे.
विशाळगडचा परिसर हा बिबट्या, गवे आणि दुर्मिळ पक्ष्यांचे हक्काचे घर आहे. मात्र, मानवी हस्तक्षेप आणि शिकारींच्या वाढत्या हालचालींमुळे या नैसर्गिक संपदेला धोका निर्माण झाला होता. आता वन कर्मचाऱ्यांसोबतच हे 'तिसरे डोळे' २४ तास सतर्क राहणार आहेत. जंगलात संशयास्पद हालचाली करणाऱ्यांच्या हालचाली आणि जाणीवपूर्वक आग लावणाऱ्या प्रवृत्तींचे फोटो व व्हिडिओ आता थेट पुरावा म्हणून उपलब्ध होणार आहेत. याशिवाय, वन्यजीवांचे मार्ग आणि त्यांच्या स्थलांतराचा शास्त्रीय अभ्यास करणे यामुळे सुलभ होणार आहे.
वनविभागाच्या या 'हाय-टेक' निर्णयामुळे निसर्गप्रेमींमधून समाधान व्यक्त होत असून, सह्याद्रीच्या या कुशीत आता वन्यजीव अधिक मोकळा श्वास घेऊ शकणार आहेत.
पुराव्यासह कारवाई : शिकारींचे फोटो आणि व्हिडिओ थेट कोर्टात पुरावा म्हणून ग्राह्य धरता येतील.
वणव्यांवर नियंत्रण: जंगलात मुद्दाम आग लावणाऱ्या प्रवृत्तींची ओळख आता पटवता येईल.
प्राण्यांचा अभ्यास: वन्यजीवांचे मार्ग समजल्यामुळे मानवी हस्तक्षेप टाळण्यास मदत होईल.
विशाळगडची निसर्गसंपदा अमूल्य आहे. तंत्रज्ञानाच्या या वापरामुळे गुन्हेगारांवर वचक बसेल आणि वन्यजीवांच्या अधिवासात मानवी हस्तक्षेप कमी होईल. निसर्ग संवर्धनाच्या या मोहिमेत नागरिकांनीही वन विभागाला सहकार्य करावे.
— सुषमा जाधव, वनपरिक्षेत्र अधिकारी (पेंढाखळे)
