कोल्हापूर : गेल्या अनेक दिवसांपासून चर्चेत असणार्या कोल्हापूर ते नागपूर विमानसेवेला दि. 15 मेपासून सुरुवात होणार आहे. ही विमानसेवा आठवड्यातून पाच दिवस असणार आहे. यामध्ये 12 बिझनेस क्लास आणि 64 इकॉनॉमी क्लास आसन व्यवस्था असणार आहे. यामुळे कोल्हापूर थेट आता राज्याच्या उपराजधानीशी हवाई मार्गे जोडले जाणार असल्याची माहिती खासदार धनंजय महाडिक यांनी दिली.
कोल्हापूर ते नागपूर विमानसेवा सुरू व्हावी, यासाठी गेल्या अनेक दिवसांपासून प्रयत्न करत होतो. कोल्हापूर विमानतळाचा विकास आणि विस्तारासाठी सातत्याने आपला केंद्राकडे पाठपुरावा सुरू होता. त्यामुळे धावपट्टी विस्तारीकरण, नाईट लँडिंग, आधुनिक अग्निशमन वाहन, नवी टर्मिनल बिल्डिंग अशी कामे मार्गी लागली आहेत. विमानतळावरील भौतिक सुविधांसह विविध मार्गांवर हवाई सेवा सुरू व्हावी, यासाठी देखील प्रयत्नशील आहे. त्याचाच एक भाग म्हणून आता कोल्हापूर ते नागपूर विमानसेवा सुरू होत आहे. 15 मेपासून मंगळवार, बुधवार, गुरुवार, शुक्रवार आणि शनिवार असे आठवड्यातील पाच दिवस, स्टार एअरवेजकडून सुरू होत आहे. नागपूरहून सकाळी दहा वाजता विमान उड्डाण करेल आणि सकाळी साडेअकरा वाजता कोल्हापुरात येईल. सकाळी बारा वाजता कोल्हापुरातून विमान उड्डाण करेल आणि दुपारी दीड वाजता हे विमान नागपूरमध्ये पोहोचेल. या विमानात बारा बिझनेस क्लास आणि 64 इकाँनॉमी क्लास आसने असतील. या नवीन विमानसेवेमुळे कोल्हापूरच्या व्यापार, उद्योग, पर्यटन क्षेत्राला मोठी चालना मिळेल, असा विश्वासही खासदार महाडिक यांनी व्यक्त केला.
