कोल्हापूर : कोल्हापूर शहरात स्वाईन फ्लूचे १० सक्रिय रुग्ण आढळले आहेत. नागरिकांनी घाबरून न जाता आवश्यक ती दक्षता व काळजी घेऊन स्वाईन फ्लूचा प्रसार रोखण्यासाठी सहकार्य करावे, असे आवाहन महापालिकेने पत्रकाद्वारे केले आहे.
स्वाईन फ्लू हा विषाणूजन्य श्वसनविकार असून, संक्रमित व्यक्तीच्या खोकताना, शिंकताना किंवा बोलताना बाहेर पडणाऱ्या श्वसनातील थेंबाद्वारे त्याचा प्रसार होऊ शकतो. त्यामुळे नागरिकांनी वैयक्तिक स्वच्छता, योग्य मास्क वापर आणि आजारी व्यक्तीपासून सुरक्षित अंतर ठेवणे याबाबत विशेष काळजी घेणे आवश्यक आहे.
नागरिकांनी घ्यावयाची दक्षता...
ताप, खोकला, घसा दुखणे, सर्दी, अंगदुखी, डोकेदुखी, अशक्तपणा यांसारखी लक्षणे आढळल्यास दुर्लक्ष करू नये. लक्षणे जाणवत असल्यास गर्दीच्या ठिकाणी जाणे टाळावे. इतर व्यक्तींच्या संपर्कात येताना मास्कचा वापर करावा. खोकताना किंवा शिंकताना नाक व तोंड रुमालाने किंवा टिश्यूने झाकावे. वापरलेला टिश्यू योग्य पद्धतीने टाकावा. साबणाने वारंवार हात धुवावेत, हँड सॅनिटायझरचा वापर करावा. डोळे, नाक व तोंडाला अस्वच्छ हातांनी स्पर्श करणे टाळावे. आजारी व्यक्तीच्या जवळचा अनावश्यक संपर्क टाळावा. ताप, खोकला किंवा इतर श्वसनविषयक लक्षणे असल्यास स्वतःहून औषधे घेण्याऐवजी वैद्यकीय सल्ला घ्यावा. विशेषतः लहान मुले, ज्येष्ठ नागरिक, गर्भवती महिला तसेच मधुमेह, हृदयरोग, श्वसनविकार किंवा इतर दीर्घकालीन आजार असलेल्या व्यक्तींनी लक्षणे आढळल्यास तातडीने वैद्यकीय तपासणी करून घ्यावी. महापालिकेची ११ नागरी प्राथमिक आरोग्य केंद्रे व २८ उपकेंद्रे तपासणीसाठी कार्यरत आहेत.
काय आहेत लक्षणे
संसर्ग झाल्यानंतर एक ते चार दिवसांत लक्षणे दिसून येतात. ताप, खोकला, घसा खवखवणे किंवा दुखणे, नाक वाहणे, सांधे व स्नायू दुखणे, डोकेदुखी आणि अशक्तपणा ही प्रमुख लक्षणे आहेत. काही रुग्णांमध्ये श्वसनास त्रास किंवा न्यूमोनियासारखी गंभीर लक्षणेही दिसून येऊ शकतात.
कसा होतो आजार
स्वाईन फ्लू हा इन्फ्लुएन्झा (एच वन एन वन) विषाणूमुळे होणारा संसर्गजन्य आजार आहे. खोकताना, शिंकताना किंवा बोलताना हवेतून बाहेर पडणाऱ्या थेंबांद्वारे तसेच संक्रमित व्यक्तीच्या थेट संपर्कातून या आजाराचा प्रसार होऊ शकतो. संक्रमित वस्तू किंवा पृष्ठभागाला स्पर्श केल्यानंतर चेहरा, नाक, डोळे किंवा तोंडाला स्पर्श केल्यानेही संसर्ग होण्याची शक्यता आहे.
प्रतिबंधात्मक काय करावे
सार्वजनिक व गर्दीच्या ठिकाणी मास्कचा वापर नागरिकांनी करावा, नियमितपणे साबणाने हात स्वच्छ धुवावेत किंवा सॅनिटायझरचा वापर करावा. आजारी व्यक्तीपासून योग्य अंतर ठेवावे, अनावश्यक गर्दी टाळावी तसेच स्वच्छ व ताजे अन्न सेवन करावे.
काय काळजी घ्यावी
स्वाईन फ्लू झालेल्या रुग्णाने इतरांशी संपर्क कमी ठेवून पुरेशी विश्रांती घ्यावी. पाणी, सूप व उकळलेले पाणी मुबलक प्रमाणात घ्यावे. ताप व अंगदुखीसाठी डॉक्टरांच्या सल्ल्याने औषधोपचार घ्यावेत. श्वास घेण्यास त्रास होने, सतत ताप राहणे किंवा लक्षणे गंभीर होणे आदी बाबी आढळल्यास तातडीने शासकीय अथवा खासगी रुग्णालयात वैद्यकीय उपचार घ्यावेत.
