मिणचे खुर्द : भुदरगड तालुक्यातील फये लघू पाटबंधारे प्रकल्प पूर्ण क्षमतेने भरून ओसंडला आहे. सांडव्यावरून ५० क्युसेक विसर्ग होत आहे. प्रकल्प क्षेत्रात जोरदार पाऊस सुरू असल्याने ३३.४२ मीटर उंची व ३५५.६५ मीटर लांबीचा हा प्रकल्प पूर्ण क्षमतेने भरला आहे. या प्रकल्पाची १३८.८८ दशलक्ष घनफूट पाणी साठवणूक क्षमता आहे. प्रकल्पात पूर्ण पाणीसाठा झाला असून सांडव्यावरून पाण्याचा विसर्ग सुरू आहे.
प्रकल्पांतर्गत ९७२ हेक्टर लाभक्षेत्र असून सिंचन क्षेत्र ७०० हेक्टर आहे. शेतीच्या पाण्यासाठी मोर ओहोळेवर बारा बंधारे बांधण्यात आलेले आहेत. प्रत्येक वर्षी हा प्रकल्प पूर्ण क्षमतेने भरतो. या प्रकल्पाच्या गेटच्या गळतीचे काम सुरू होते. त्यामुळे यावर्षी प्रकल्पात उशीरा पाणीसाठा करण्यात आला. त्यामुळे प्रकल्प पूर्ण क्षमतेने भरेल की नाही, याची चिंता लाभक्षेत्रातील शेतकऱ्यांना होती. सध्या हा प्रकल्प पूर्ण क्षमतेने भरल्यामुळे लाभ क्षेत्रातील बळीराजा सुखावला आहे. शेतीच्या पाण्यासह पिण्याच्या पाण्याचा प्रश्न मिटणार आहे.
