अनिल देशमुख
कोल्हापूर : छत्रपती प्रमिलाराजे सर्वोपचार रुग्णालय अर्थात सीपीआरसह राज्यातील सहा शासकीय वैद्यकीय महाविद्यालयांच्या रुग्णालय आवारात धर्मशाळा होणार आहे. गुजरात राज्यातील सेवादान आरोग्य फाऊंडेशन, अहमदाबादकडून ना नफा - ना तोटा तत्त्वावर या धर्मशाळा उभारून चालवल्या जाणार आहेत. याकरिता या फाऊंडेशनला ४९ वर्षांसाठी रुग्णालयाच्या आवारातील जमीन एक रुपये प्रतिवर्ष नाममात्र भुईभाड्याने उपलब्ध करून दिली जाणार आहे.
शासकीय वैद्यकीय महाविद्यालये व संलग्न रुग्णालयांत दाखल होणाऱ्या रुग्णांच्या नातेवाईकांना अल्पदरात सुरक्षित निवास, स्वच्छतागृह, स्नानगृह, पिण्याचे पाणी, भोजन व्यवस्था व इतर मूलभूत सुविधा देण्यासाठी फाऊंडेशनने धर्मशाळा उभारण्याचा प्रस्ताव शासनाला दिला होता. या प्रस्तावाला अटी व शर्तीसह राज्य शासनाने सोमवारी मान्यता दिली. फौंडेशनकडून गुजरात, उत्तर प्रदेश, आसाम, उत्तराखंड, छत्तीसगड व राजस्थान राज्यांतील विविध शासकीय रुग्णालयांत धर्मशाळा प्रकल्प यशस्वीरीत्या राबविण्यात येत असल्याचेही या आदेशात म्हटले आहे.
या धर्मशाळा उभारणी प्रकल्पाच्या प्रभावी अंमलबजावणी, देखरेख, समन्वय, तक्रार निवारण व शासन निर्णयातील अटी व शर्तीचे पालन करण्यासाठी प्रत्येक प्रकल्पस्थळी जिल्हाधिकाऱ्यांच्या अध्यक्षतेखाली जिल्हास्तरीय संयुक्त व्यवस्थापन समिती स्थापन करण्यात आली आहे.
धर्मशाळेमुळे काय होणार...
रुग्णांच्या नातेवाईकांना अल्प दरात निवास, भोजन व इतर मूलभूत सुविधा उपलब्ध होणार. रुग्णांच्या कुटुंबीयांना भावनिक आधार मिळणार.
