कोल्हापूर, पुढारी वृत्तसेवा : राज्यात थंडीची चाहूल लागताच दरवर्षीप्रमाणे यंदाही परदेशी स्थलांतरित पक्ष्यांचे (Migratory Birds) आगमन झाले आहे. विविध देशांतून हजारो मैलांचा प्रवास करून आलेले हे हिवाळी पाहुणे पक्षीप्रेमींच्या आकर्षणाचे केंद्र ठरतात. हे स्थलांतरित पक्षी आपल्याकडील निसर्गाचे वैभव वाढवतातच, स्थानिक जैवविविधतेसाठीही महत्त्वाचे ठरतात. जिल्ह्यातील भुदरगडच्या डोंगररांगांमध्येही स्थलांतरित पक्षी दाखल झाले आहेत. यामध्ये आफ्रिकेतील जांभळ्या बगळ्याचाही समावेश आहे.
स्थलांतरित पक्षी भुदरगडच्या डोंगररांगांमध्ये दाखल झाले आहेत. यावर ज्येष्ठ पत्रकार डॉ. सुभाष के. देसाई यांनी फेसबुक पोस्ट केली आहे. त्यांनी म्हटले आहे की, "डॉक्टर राहुल दड्डीकर, डॉक्टर सदलगे नेहमीच सकाळी पाच ते साडेसात फिरायला जातो. पाणथळ भाग भरपूर आहे. अशा ठिकाणी आम्हाला आठ-पंधरा दिवसाला थंडीच्या दिवसात नवीन पक्षी दिसतात. आज सकाळी सहाच्या दरम्यान शिंदेवाडी जवळच्या एका पाण्याच्या 'खाणी'जवळ एक वेगळाच, लांबच लांब मानेचा उंच पक्षी दिसला आणि त्याचा शोध घेताना आफ्रिकेतून जांभळा बगळा असल्याचे स्पष्ट झाले."
आफ्रिकेतील जांभळा बगळा हा मोठा, पाणथळ प्रदेशात दिसणारा पक्षी महाराष्ट्रातील पाणथळ जागांमध्ये आणि पाण्याजवळील परिसरात सामान्यपणे आढळतो. याच्या अंगावर जांभळट-तांबूस रंगाचे पिसे असतात, पंख करड्या (slate grey) रंगाचे असतात आणि छातीवर लालसर-तपकिरी (rufous brown) छटा दिसते. ही प्रजाती आफ्रिका, मध्य आणि दक्षिण युरोप तसेच दक्षिण आणि पूर्व आशिया या प्रदेशांत प्रजनन करते. युरोपियन आणि इतर आशियाई पक्षीसंख्या स्थलांतरित असून, हिवाळ्यात अनुक्रमे आफ्रिका व आशियाच्या अधिक दक्षिणेकडील भागात स्थलांतर करतात, असेही डॉ. सुभाष देसाई यांनी आपल्या पोस्टमध्ये नमूद केले आहे.
