आजरा : आजरा शहरात चोरट्यांनी निवृत्त प्राध्यापक डॉ. नवनाथ शिंदे यांची घरातून १४ लाख ४२ हजार ५०० रुपयांचे १५ तोळे ६ ग्रॅम वजनाचे सोन्याचे दागिने लंपास केले. याशिवाय आणखी दोन ठिकाणीही चोरट्यांनी घरे फोडली. यात चांदीचे दागिने व रोख २० हजार रुपये लंपास केले. याबाबत प्रकाश नवनाथ शिंदे (रा. शिवकॉलनी, गांधीनगर रोड) यांनी आजरा पोलिसांत फिर्याद दिली आहे.
शनिवारी पहाटे चार ते सकाळी ११ पर्यंत शिवकॉलनी, गांधीनगर रोड व आजूबाजूच्या परिसरात या घटना घडल्या. बंद घराच्या दरवाजाचा कडी-कोयंडा तोडून चोरट्यांनी शिंदे यांच्या घरात प्रवेश केला. घरातील सोन्या-चांदिचे दागिने व रोख रक्कम असा एकूण १४ लाख ४२ हजार रुपयांचा मुद्देमाल लंपास केला. युवराज जानबा जाधव यांचे ९.५ ग्रॅम वजनाचे दागिने व 3 तोळे वजनाचे चांदीचे दागिने, तसेच संजय यशवंत भोये यांच्या मालकीची ७० हजार रुपये किमतीची मोटारसायकल लंपास केली. श्वानपथकाला पाचारण केले; मात्र याचा उपयोग झाला नाही. चोरटे मोटारसायकलने पसार झाल्याचा प्राथमिक अंदाज आहे. सहायक पोलीस निरीक्षक बाबासाहेब सरवदे यांच्या नेतृत्वाखाली पुढील तपास सुरू आहे.
