राजेंद्र दा. पाटील
कौलव : एकीकडे संपूर्ण गाव दिवाळीच्या आनंदात व प्रकाशाच्या उत्सवात न्हाऊन निघाले असताना, तरसंबळेतील कांबळे कुटुंबावर मात्र नियतीने असा क्रूर घाला घातला की, त्यांच्या आयुष्यात कायमचा अंधार पसरला. ज्या दिवाळीत घरात सुखाचा प्रकाश पसरेल अशी आशा होती, त्याच दिवाळीत एका भीषण अपघाताने या कुटुंबाचा आधारच हिरावून घेतला. या हृदयद्रावक घटनेत एकाच कुटुंबातील तिघांचा मृत्यू झाला असून, तीन संसार क्षणात उद्ध्वस्त झाले आहेत.
तरसंबळे येथील श्रीकांत कांबळे, त्यांची बहीण दीपाली आणि पुतणी कौशिकी यांचा मंगळवारी झालेल्या एका भीषण अपघातात जागीच मृत्यू झाला, तर दीपाली यांचा एकुलता मुलगा अथर्व गंभीर जखमी असून, रुग्णालयात मृत्यूशी झुंज देत आहे. या घटनेने कांबळे कुटुंबावर दुःखाचा डोंगर कोसळला आहे.
कांबळे कुटुंबाचा संघर्ष नवा नाही. काही वर्षांपूर्वी वडिलांचे अकाली छत्र हरपल्यानंतर दोन्ही भाऊ श्रीकांत आणि सचिन कुटुंबाचा गाडा ओढत होते. श्रीकांत पुण्यात, तर सचिन कोल्हापुरात नोकरी करून संसाराला हातभार लावत होते. आई शेतमजुरी करून घर सांभाळत होती. त्यांची एकुलती एक बहीण दीपाली, जिचा विवाह शेंडूर येथे झाला होता, तिच्याही नशिबी दुःखच आले. पतीच्या अकाली निधनानंतर ती आपला मुलगा अथर्वसह माहेरी, तरसंबळे येथेच आधारासाठी परतली होती. गेल्या काही काळापासून दुर्दैव जणू या कुटुंबाची पाठच सोडत नव्हते.
पतीच्या निधनानंतर दीपालीसाठी अथर्व हाच एकमेव आशेचा किरण होता. त्याच्या भविष्यासाठी ती जगत होती. मात्र, मंगळवारच्या अपघाताने त्याच्या डोक्यावरील आईचे छत्रही हिरावून घेतले आहे. आता अथर्व रुग्णालयात एकाकी झुंज देत आहे, आणि त्याच्या भविष्याचा प्रश्न निर्माण झाला आहे.
या अपघातामुळे श्रीकांत, दीपाली आणि त्यांच्या भावाची मुलगी कौशिकी यांचे संसार कायमचे उद्ध्वस्त झाले आहेत. दिवाळी, जो प्रकाशाचा आणि नव्या सुरुवातीचा सण मानला जातो, तोच कांबळे कुटुंबासाठी कधीही न संपणार्या काळरात्रीचा शाप घेऊन आला. कांबळे कुटुंबावर कोसळलेल्या या दु:खद प्रसंगामुळे संपूर्ण परिसरातून तीव्र हळहळ व्यक्त होत आहे. नियतीच्या या अकल्पनीय आघाताने सर्वांनाच निःशब्द केले आहे.
दीपालीच्या पतीचे अकाली निधन झाल्याने ती मुलासह माहेरी परतली.
अवघ्या पंधरा दिवसांपूर्वी, श्रीकांत यांच्या एकुलत्या एका मुलीचाही दुर्दैवी मृत्यू झाला होता. या धक्क्यातून कुटुंब सावरत नाही, तोच काळाने घाला घातला.
आजच्या अपघाताने श्रीकांत आणि दीपाली या दोघा भावंडांचा जीव घेतला, ज्यामुळे दोन कुटुंबे उघड्यावर आली.
