इचलकरंजी : कबनूर येथील गोळीबार प्रकरणाच्या तपासाला धक्कादायक वळण मिळाले आहे. या प्रकरणातील मुख्य संशयित तुषार लक्ष्मण येरुडकर (वय २४, रा. दत्तनगर, कबनूर) हा व्हीएमसी मशिनद्वारे पिस्टल तयार करत असल्याचे उघडकीस आले असून, कबनूरसह जिल्ह्यात खळबळ उडाली आहे. या कारवाईत त्याच्याकडून १ देशी बनावटीचे पिस्टल, २८ जिवंत काडतुसे, ३ रिकाम्या पुंगळ्या, गन पावडर, स्टीलचे पार्ट व इतर साहित्य असा ७४ हजार ५०० रुपयांचा मुद्देमाल जप्त करण्यात आला. मुख्य सूत्रधार मनीष हाबळे हा पसार आहे. या माध्यमातून पिस्टल तयार करून विक्रीचे मोठे रॅकेट चालवण्यात येत असल्याचा संशय आहे.
कबनूरमध्ये चार दिवसांपूर्वी गोळीबाराची घटना घडली होती. यात नीलेश कांबळे हा युवक बंदूक हाताळताना जखमी झाला होता. या प्रकरणाच्या चौकशीत हा कारखाना उघडकीस आला. याप्रकरणी पोलिसांनी नीलेशचा साथीदार शुभम सूर्यवंशी व जॉकी माळगे या दोघांना अटक केली. त्यांच्याकडून एक पिस्टल, चारचाकी वाहन आणि रिकामी पुंगळी जप्त केली होती. या गुन्ह्यात मनीष हाबळे व तुषार येरुडकर ही दोन नावे पुढे आली.
संशयित येरुडकरला ताब्यात घेऊन त्याच्याकडे चौकशी केली असता बंदूकनिर्मितीचा प्रकार उजेडात आला. त्याने रिकामी पुंगळी, गन पावडर तसेच बंदूक बनवण्यासाठी उपयुक्त स्टीलचे पार्ट, काडतूस बनवण्यासाठीचे पार्ट आदीच्या माध्यमातून पिस्टल असेंबल करीत होता. बंदूक विक्रीचे मोठे रॅकेट सक्रिय असल्याचा यामुळे संशय व्यक्त होत आहे. दरम्यान, पोलिस कोठडीची मुदत संपल्याने न्यायालयासमोर हजर केलेल्या शुभम सूर्यवंशी व जॉकी माळगे या दोघांची न्यायालयीन कोठडीत रवानगी करण्यात आली तर येरुडकरला १३ ऑगस्टपर्यंत पोलिस कोठडी सुनावण्यात आली. ही कारवाई शिवाजीनगरचे पो.नि. शरद मेमाणे, स्थानिक गुन्हे अन्वेषण शाखेचे सुशांत चव्हाण व त्यांच्या पथकाने केली.
