कोल्हापूर : गोकुळ पशुखाद्य वाहतूक संस्थांकडून अपहाराच्या रकमेवरील 14 लाख रुपये व्याजही वसूल करणार आहे. अपहारप्रकरणी चौकशी अधिकाऱ्यांनी आकारलेल्या या व्याजाची रक्कम भरण्याबाबत गोकुळने संबंधित सहा वाहतूक संस्थांना नोटीस बजावली आहे. जाजम व घड्याळ खरेदी संघाच्या पोटनियमानुसारच झाली असल्याचे चौकशी अधिकारी सदाशिव गोसावी यांनी दुग्ध विभागाकडे सादर केलेल्या अहवालात म्हटले आहे.
गोकुळमध्ये 2024-25 च्या आर्थिक वर्षात पशुखाद्य वाहतुकीत अपहार झाला होता. पंचतारांकित औद्योगिक वसाहत, कागल व महालक्ष्मी पशुखाद्य कारखाना गडमुडशिंगी येथून पशुखाद्याची वाहतूक करण्याचा ठेका वाहतूक संस्थांकडे आहे. कारखाना ते संस्थांपर्यंतच्या वाहतुकीच्या अंतरावर संस्थांना भाडे दिले जाते; पण सहा वाहतूक संस्थांनी जादा अंतर दाखवून अपहार केला आहे. अपहाराची रक्कम 79 लाख रुपये आहे. या रकमेवरील 14 लाख 13 हजार 885 रुपये व्याज वसूल करण्याचे आदेश दिले आहेत.
