कोल्हापूर : प्रभाग रचनेचे काम वेळापत्रकानुसार करा, अशा सूचना राज्य निवडणूक आयुक्त दिनेश वाघमारे यांनी दिल्या. जिल्हाधिकारी कार्यालयात मंगळवारी त्यांनी जिल्ह्यातील स्थानिक स्वराज्य संस्थांच्या निवडणूक तयारीचा आढावा घेतला. या बैठकीनंतर त्यांनी करवीर तहसील कार्यालयातील ईव्हीएम स्ट्राँगरूमची पाहणी केली.
जिल्हाधिकारी अमोल येडगे यांनी जिल्ह्यातील स्थानिक स्वराज्य संस्थांच्या निवडणुकीची माहिती दिली. मतदार संख्या, इलेक्ट्रॉनिक व्होटिंग मशिन (ईव्हीएम), मतदान केंद्रांची व्यवस्था आणि इतर अनुषंगिक तयारीची माहिती दिली. त्यांनी जिल्हा परिषद, पंचायत समिती, महानगरपालिका, नगरपरिषदा आणि नगरपंचायतींच्या सार्वत्रिक निवडणुकांसाठी प्रभाग रचनेच्या कार्यक्रमाची माहितीही आयुक्तांना दिली. यावेळी त्यांनी प्रभाग रचनेचे वेळापत्रक, मतदान केंद्रांची रचना आणि निवडणूक प्रक्रियेच्या तयारीबाबत सादरीकरण केले.
प्रभाग रचना वेळापत्रकानुसार योग्य पद्धतीने राबविण्याच्या स्पष्ट सूचना देत आयुक्त वाघमारे म्हणाले, मतदान केंद्रांची निश्चिती करताना सर्व सुविधांची पडताळणी करा. आवश्यक दुरुस्त्या तातडीने पूर्ण करा. मतदान केंद्रांवर पाणी, वीज, स्वच्छतागृहे यासारख्या मूलभूत सुविधांची उपलब्धता आहे की नाही पाहा आणि त्या वेळेत पूर्ण करा. निवडणूक प्रक्रियेत सहभागी होणार्या अधिकार्यांना आणि कर्मचार्यांना राज्य निवडणूक आयोगाच्या मार्गदर्शक सूचनांनुसार प्रशिक्षण द्या, असे सांगत प्रशिक्षणामुळे निवडणूक प्रक्रिया अधिक पारदर्शक आणि कार्यक्षम होईल, असे सांगत ते म्हणाले, निवडणूक प्रक्रिया पारदर्शक, निष्पक्ष आणि सुरळीतपणे पार पाडा. यासाठी संबंधित सर्व अधिकार्यांनी सज्ज राहा. स्थानिक स्वराज्य संस्थांच्या निवडणुका लोकशाहीचा पाया मजबूत करणार्या असून, यासाठी सर्व यंत्रणांनी समन्वयाने काम करावे, असे त्यांनी सांगितले. बैठकीला कोल्हापूर महापालिका आयुक्त के. मंजूलक्ष्मी, इचलकरंजी महापालिका आयुक्त पल्लवी पाटील, अपर जिल्हाधिकारी संजय तेली, उपजिल्हाधिकारी संपत खिलारी, निवासी उपजिल्हाधिकारी संजय तेली यांच्यासह सर्व उपजिल्हाधिकारी आणि प्रांताधिकारी उपस्थित होते.
या बैठकीनंतर आयुक्त वाघमारे यांनी करवीर तहसील कार्यालयात राज्य निवडणूक आयोगाच्या ईव्हीएम ठेवलेल्या स्ट्राँग रूमला भेट दिली. यावेळी त्यांनी ईव्हीएमच्या सुरक्षिततेची आणि व्यवस्थापनाची पाहणी केली. यावेळी जिल्हाधिकारी अमोल येडगे, प्रांताधिकारी मौसमी चौगले, तहसीलदार स्वप्निल रावडे आदींसह संबंधित अधिकारीही उपस्थित होते.
