Gadhinglaj Swabhimani worker beaten
गडहिंग्लज : गिजवणे जिल्हा परिषद मतदार संघामध्ये फार मोठ्या प्रमाणात चुरस असून यातूनच गिजवणेमध्ये सकाळच्या टप्प्यात वादावादी झाल्यानंतर पुन्हा दुपारी साडेबाराच्या सुमारास या ठिकाणी दोन गटांमध्ये झुंबड उडाली. मतदानासाठी चाललेल्या मतदारांना बोलावण्यावरून व चिन्ह सांगण्यावरून वाद वाढला.
हा वाद इतका वाढला की एकमेकांच्या अंगावर जाऊन मारामारी करण्यापर्यंतचा हा प्रकार वाढला. जमाव मोठ्या प्रमाणात जमा झाल्याने संकेश्वर बांदा या राष्ट्रीय महामार्गावर मोठ्या प्रमाणात गोंधळ उडाला होता. घटनेची माहिती मिळताच पोलीस निरीक्षक अजय सिदकर हे ज्यादा कुमक घेऊन घटनास्थळी पोहोचले.
त्यांनी दोन्हीकडच्या कार्यकर्त्यांना सज्जड दम देत अशाप्रकारे पुन्हा प्रकार केल्यास कारवाई करू, असा इशारा दिला . या ठिकाणी राज्य राखीव दलाची पोलीस तुकडी ही मागवण्यात आले असून रात्रीपर्यंत या ठिकाणी सदर तुकडीला थांबण्याच्या आदेश दिले आहेत.
दरम्यान सकाळच्या सत्रात हलकर्णी जिल्हा परिषद मतदार संघातील आरळगुंडी गावामध्ये स्वाभिमानीच्या कार्यकर्त्याला मारहाण झाली. यामध्ये हा कार्यकर्ता जखमी झाला असून त्याबाबत ही पोलिसांच्या कडून चौकशी सुरू आहे.
