Balu Mama Palki Welcome Kaulav
कौलव : श्रीक्षेत्र आदमापुर येथील श्री बाळूमामा देवस्थानच्या बग्गा क्रमांक सहा ची पालखी व बकऱ्यांचे कौलव येथे आगमन झाले आहे. सलग तीन दिवस पंचक्रोशीतील भाविकांचा दर्शनासाठी महापूर लोटला आहे.
कौलव येथे प्रथमच पालखी व बकऱ्यांचे आगमन झाल्यामुळे परिसरातील भाविकांमध्ये मोठी उत्सुकता होती . ठिकपुर्ली येथून आलेल्या या पालखीचे ग्रामस्थांनी वाद्यांच्या गजरात व भंडाऱ्याच्या उधळणीत बाळूमामाच्या नावाने चांगभलं च्या जयघोषात मोठ्या उत्साहाने स्वागत केले.
पालखी मार्गावर रांगोळ्यांसह सजावट करण्यात आली होती .ग्रामपंचायत गावातील सर्व संस्था ,तरुण मंडळे व भाविकांनी दररोज विविध कार्यक्रमांचे आयोजन केले आहे. पहाटे अभिषेक व काकड आरती व नैवेद्य अर्पण केला जातो. संध्याकाळी प्रवचन, महाआरती, महाप्रसादाचे व भजनाचे आयोजित केले जात आहे .दररोज संध्याकाळी होणाऱ्या महाप्रसादास पंचक्रोशीतील हजारो भाविकांनी गर्दी केली आहे.
बकऱ्यांच्या कळपाच्या ठिकाणी दररोज मेंढी पूजन व ओटी भरणी साठी महिलांची अक्षरशः रिघ लागली आहे .दररोज विविध गल्ल्यातून व बाहेरगावाहून महिला गारवा व महाप्रसादासाठी साहित्य घेऊन वाजत गाजत येत आहेत. शनिवारी या पालखीचे कौलवमधून प्रस्थान होणार आहे.
