कोल्हापूर : अमरावती येथील 70 लाखांच्या ऑनलाईन फसवणुकीच्या गुन्ह्यात अमरावती शहर सायबर पोलिसांनी कोल्हापूर येथील कुलदीप अशोक सावरतकर (40, रा. अहिल्याबाई होळकरनगर, फुलेवाडी रोड, कोल्हापूर) यास मंगळवारी अटक केली. सावरतकर याच्या काश्वी ट्रेडिंग कार्पोरेशन कंपनीची सायबर पोलिसांनी चौकशी सुरू केली आहे.
शेअर मार्केटमधून दामदुप्पट परतावा मिळवून देण्याच्या आमिषाने अमरावती येथी एका व्यापाऱ्याची 70 लाखाची ऑनलाईन फसवणूक झाली आहे. ऑगस्ट 2025 मध्ये याप्रकरणी गुन्हा दाखल झाला आहे. या फसवणुकीतील 5 लाखांची रक्कम कोल्हापूर येथील काश्वी ट्रेडिंग कार्पोरेशन कंपनीच्या बँक खात्यावर जमा झाली आहे.
संबंधित रक्कम अन्य काही खात्यावर जमा करण्यात आली आहे. काश्वी ट्रेड्रिंगचा मालक कुलदीप सावरतकर हा असून त्यानेच संबंधित रक्कम अन्य खात्यावर जमा केल्याचे निष्पन्न झाले आहे. अमरावती शहर सायबर पोलिसांनी मंगळवारी सकाळी कोल्हापुरात येऊन संशयिताला ताब्यात घेतले. सावरतकर याच्या बँक खात्याचीही चौकशी करण्यात येत असल्याचे सांगण्यात आले. तपासात ऑनलाईन फसवणुकीचे रॅकेट चव्हाट्यावर येण्याची शक्यता अधिकाऱ्यांनी व्यक्त केली.
