दोडामार्ग ः पर्यटनासाठी गोव्याला जाणाऱ्या तामिळनाडूमधील पर्यटकांच्या टेम्पो ट्रॅव्हलरचा तिलारी घाटात गुरुवारी सायंकाळी अपघात झाला. टेम्पो ट्रॅव्हलर तिलारी घाट उतरत असताना चालकाला अवघड वळण आणि तीव्र उताराचा अंदाज न आल्याने चालकाचे वाहनावरील नियंत्रण सुटले व संरक्षक कठड्यावर आदळले. यात तिघे गंभीर जखमी झाले अन्य काहीजण किरकोळ जखमी झाले आहेत. वाहनाच्या दर्शनी भागाचे मोठे नुकसान झाले आहे.
दरम्यान कोल्हापूरहून दोडामार्गच्या दिशेने येणाऱ्या एसटी बसमधील चालक, वाहक व प्रवाशांनी मदत करत जखमी पर्यटकांना दोडामार्ग ग्रामीण रुग्णालयात दाखल केले. या टेम्पो ट्रॅव्हलरमध्ये एकूण 15 पर्यटक होते. त्यामध्ये 9 पुरुष व 6 महिलांचा समावेश होता. अपघातात दर्शनी जे. यांच्या तोंडाला दुखापत झाली असून कल्पना ज्योती (43, रा. चेन्नई) यांच्या डोक्याला मार बसला आहे. तसेच आरोग्य राज (36, रा. चेन्नई) यांच्यासह इतर काही पर्यटकांना किरकोळ दुखापती झाल्या आहेत. रुग्णालयाचे वैद्यकीय अधीक्षक डॉ. नित्यानंद मसुरकर, डॉ. अतुल, डॉ. तुषार, परिचारिका व अन्य कर्मचाऱ्यांनी जखमींवर तत्काळ उपचार केले. सध्या सर्व जखमींची प्रकृती स्थिर असल्याचे वैद्यकीय सूत्रांनी सांगितले.
