कणकवली : तळेरेत बसस्थानकामध्ये बुधवारी सायंकाळी 6 ते गुरूवारी सकाळी 5 वा. या कालावधीमध्ये झोपून असलेल्या वैभववाडी तालुक्यातील कुर्ली गावातील विजय बबन कोकरे (29) याचा झोपेतच मृत्यू झाला.
याची खबर तळेरे बसस्थानकाचे वाहतूक नियंत्रक प्रभाकर राजाराम कामत यांनी कणकवली पोलिसात दिली. तळेरे बसस्थानकात वाहतूक नियंत्रक म्हणून कार्यरत असलेल्या प्रभाकर कामत यांना बुधवारी सायंकाळी 6 वा. च्या सूमारास एक तरूण झोपलेला असल्याचे दिसून आले. त्यांनी त्याच्या तोंडावर पाणी मारून उठविण्याचा प्रयत्न केला असता तो दारूच्या नशेत होता.
त्याने मी इथेच झोपणार असून नंतर घरी जाणार असल्याचे कामत यांना सांगितले. त्यानंतर प्रभाकर कामत हे ड्युटी संपवून आपल्या घरी गेले. गुरूवारी पहाटे 5 वाजता प्रभाकर कामत हे तळेरे बसस्थानकात ड्युटीवर हजर झाले असता त्यांना तो तरूण तेथेच झोपलेला असल्याचे दिसून आले. त्यांनी याची माहिती पोलिसांना दिली. नंतर खाजगी डॉक्टरांना बोलवून घेत त्याची तपासणी केली असता तो मृत्यू झाल्याचे डॉक्टरांनी सांगितले.
