मळगांव : आपल्या प्रलंबित मागण्यांसाठी महिला व बालविकास विभागाच्या अधिकारी कर्मचाऱ्यांनी काळ्या फिती बांधून कामकाज केले. सर्वसमावेशक आकृतिबंध तत्काळ मंजूर करणे, नागरी स्थानिक स्वराज्य संस्थांमध्ये महिला व बालविकास विभागाची पदे निर्माण करणे, जिल्हा परिविक्षा अधिकारी पद राजपत्रित अधिकारी गट ब म्हणून घोषित करणे आदी मागण्या या कर्मचाऱ्यांच्या आहेत. विविध योजनांसाठी पुरेसे मनुष्यबळ उपलब्ध करण्याच्या मागणीसाठी सोमवार पासून आंदोलन सुरू आहे.
आंदोलनाचे स्वरूप ठरविण्यात आले असून, त्वरित मागण्या मान्य न झाल्यास अधिकाऱ्यांसह कर्मचाऱ्यांनी सामूहिक रजेवर जाण्याचा पवित्रा घेतला आहे. याबाबत अधिकारी व कर्मचाऱ्यांनी जिल्हाधिकारी तृप्ती घोडपिसे यांना निवेदन सादर केले.महिला बाल विकास विभागात अपुऱ्या मनुष्यबळा अभावी अधिकारी व कर्मचाऱ्यांवर कामाचा व्याप वाढला आहे. त्यामुळे शासनाने विविध योजनांसाठी पुरेसे मनुष्यबळ उपलब्ध करणे गरजेचे आहे. यासह इतर प्रलंबित मागण्यांसाठी राज्य महिला व बालविकास विभाग राजपत्रित अधिकारी संघटनेमार्फत आमच्या समस्यांकडे शासनाचे लक्ष वेधण्यासाठी आम्ही सनदशीर मार्गाने आंदोलन करत आहोत असे महिला व बालविकास विभागाच्या अधिकाऱ्यांच्या नेतृत्वात आंदोलन सुरु आहे.
