दोडामार्ग ः हेवाळेत टस्कर हत्तीचा धुमाकूळ सुरूच आहे. टस्कराचा आता लोकवस्तीनाजिक वावर वाढल्याने हेवाळे ग्रामस्थ व शेतकरी भयभीत झाले आहेत. हा टस्कर घरालगतच्या केळी, सुपारी, नारळ तसेच काजू बागायतींमध्ये झाडे मोडून मोठ्या प्रमाणात नुकसान करत आहे. तसेच घराशेजारी येऊन चित्कार करत असल्याने ग्रामस्थांसह पाळीव जनावरे सुद्धा भयभीत झाली आहेत शिवाय ग्रामस्थांना शेत-बागायतीत वावरणेही धोकादायक बनले आहे.
बुधवारी दोडामार्ग-वीजघर मार्गावर हेवाळे रस्त्यालगतच्या राममंदिर नजिक मोठे सुळे असलेला जंगली हत्ती ( टस्कर ) दिसून आला होता. या हत्तीचा हेवाळे गावात मुक्त संचार सुरू आहे. थेट लोकवस्तीनजिक येऊन तो धुडगूस घालत आहे. बुधवारी गावातील दत्ताराम देसाई यांच्या घरालगतच्या भेडले माडांचे नुकसान या टस्करानेे केले. त्याचबरोबर एका कारचे मोठे नुकसान केले होते, यामुळे हेवाळे परिसरातील ग्रामस्थ, शेतकरी भयभीत झाले आहेत.
