मळगाव : सावंतवाड़ी शहरात एकूण 11 हजार 957 नोंदणीकृत मालमता आहेत. यातील कर थकबाकीदारांच्या 16 मालमत्ता नगरपालिकेने जप्त केल्या आहेत. उर्वरीत कर धारकांनी 31 मार्चपर्यंत कर भरणा करावा, असे आवाहन मुख्याधिकाऱ्यांनी केले आहे. अन्यथा जप्तीची कारवाई केली जाईल, असा इशारा दिला आहे.
सावंतवाडी नगरपरिषदेच्या कर विभागाकडून मालमत्ता थकबाकीदारांवर कडक कारवाई करण्यास सुरुवात झाली आहे. मुख्याधिकारी विनायक औंधकर यांच्या मार्गदर्शनाखाली कर व प्रशासकिय अधिकारी तथा कार्यालयीन अधिक्षक वैभवकुमार अंधारे, कर व प्रशासकिय अधिकारी गोविंद गवंडे, कर निरीक्षक प्राची पाटील, लेखापाल प्रसाद बटवाल, स्वच्छता निरीक्षक विनोद सावंत, नगररचनाकार गौरव बुगड यांच्या जप्ती पथकाद्वारे शहरातील 16 मालमत्ता सील करण्यात आल्या आहेत. नगरपरिषदेकडून वारंवार आवाहन करूनही कर न भरणाऱ्या थकबाकीदारांच्या मालमता सील करणे व जप्तीची कारवाई करण्याची मोहीम हाती घेण्यात आली आहे.
