दोडामार्ग : मागील अनेक महिन्यांपासून बंद असलेली पासपोर्ट संदर्भातील मुलाखतीची प्रक्रिया गोवा येथे पूर्ववत सुरू करण्यात यावी, अशी मागणी पालकमंत्री नितेश राणे यांच्याकडे दोडामार्गचे माजी नगराध्यक्ष संतोष नानचे यांनी केली. श्री. नानचे यांनी संदर्भातील एक निवेदन मंत्री राणे यांच्या कणकवली येथील ओमगणेश निवासस्थानी भेट घेत सादर केले. येणार्या काळात सिंधुदुर्ग जिल्ह्यातच पासपोर्ट कार्यालय सुरू करण्यात येणार असल्याचे सूतोवाच यावेळी मंत्री राणे यांनी केले.
श्री. नानचे यांनी या निवेदनात म्हटले आहे, सिंधुदुर्ग जिल्ह्यातील अनेक युवक-युवती विदेशात रोजगार, पर्यटन व शिक्षणासाठी जातात. परदेशात जाण्यासाठी सर्वात महत्वाची गोष्ट म्हणजे पासपोर्ट. हा पासपोर्ट मिळविण्यासाठी यापूर्वी मुंबईत जावे लागेे. त्या ठिकाणी पासपोर्ट कार्यालयात कागदपत्रांची पडताळणी व मुलाखत होत असे. त्यानंतर सिंधुदुर्ग जिल्ह्यातील नागरिकांच्या सोयीसाठी गोवा राज्यातील पणजी येथील पासपोर्ट कार्यालयात सुरू करण्यात आले.
त्यावेळी ग्रामस्थांना गोव्यात जाऊन कागदपत्रांची पडताळणी व मुलाखत देणे सोयीस्कर पडत होते. मात्र आता गोव्यात होणारी प्रक्रिया महाराष्ट्रातील नागरिकांसाठी बंद करण्यात आली असून परत एकदा ही प्रक्रिया मुंबई येथे घेण्यात येत आहे. ही बाब खूप खर्चिक व वेळेचा अपव्यय होणारी आहे. यासाठी एकतर ही प्रक्रिया सिंधुदुर्गात सुरू करावी, अन्यथा गोव्यातील पणजी येथील पासपोर्ट कार्यालयात ती पूर्ववत सुरू करावी, अशी मागणी सिंधुदुर्गवासीयांची आहे. याकडे आपण जाणीवपूर्वक लक्ष देऊन, समस्या मार्गी लावावी, अशी मागणी श्री. नानचे यांनी मंत्री राणे यांच्याकडे केली.
यावर मंत्री राणे म्हणाले, आपण केलेली मागणी ही सिंधुदुर्गवासीयांसाठी अत्यंत गरजेची आहे. दरम्यान खा. नारायण राणे यांनी पासपोर्ट प्रादेशिक कार्यालय सिंधुदुर्ग जिल्ह्यात सुरू करावे, अशी मागणी केंद्र शासनाकडे केली आहे. येणार्या काळात लवकरच सिंधुदुर्गात पासपोर्ट कागदपत्रे पडताळणी व मुलाखत कार्यालय सुरू होणार असल्याचे सूतोवाच मंत्री राणे यांनी संतोष नानचे यांच्याशी बोलताना केले.
