सावंतवाडी : सावंतवाडी शहरात विविध गुन्हेगारी कृत्यांमध्ये सामील असलेल्या एका रेकॉर्डवरील गुन्हेगाराला सिंधुदुर्ग, रत्नागिरी आणि कोल्हापूर या तीन जिल्ह्यांतून पुढील दोन वर्षांसाठी हद्दपार (तडीपार) करण्यात आले आहे. सुनील ऊर्फ सनी बाळू पाटील (वय ३८, रा. जिमखाना मैदानाजवळ, सबनीस वाडा, सावंतवाडी) असे हद्दपार करण्यात आलेल्या संशयिताचे नाव आहे. सावंतवाडी पोलिसांनी पाठवलेला हद्दपारचा प्रस्ताव उपविभागीय दंडाधिकारी तथा प्रांताधिकारी यांनी मंजूर केला असून, त्यानुसार ही कडक कारवाई करण्यात आली आहे.
दोन वर्षांसाठी तीन जिल्ह्यांत बंदी
संशयित सुनील ऊर्फ सनी पाटील याच्यावर वराह (डुकरांचे) चोरी आणि मोटारसायकल चोरी यांसारखे गंभीर गुन्हे दाखल आहेत. त्याच्या सततच्या गुन्हेगारी कारवायांमुळे सावंतवाडी पोलिसांमार्फत त्याच्या हद्दपारीचा प्रस्ताव तयार करण्यात आला होता. प्रांताधिकाऱ्यांच्या मंजुरीनंतर, त्याला आदेश बजावल्याच्या दिनांका पासून पुढील दोन वर्षांच्या कालावधीसाठी सिंधुदुर्ग, रत्नागिरी आणि कोल्हापूर या तीन जिल्ह्यांच्या हद्दीत प्रवेश करण्यास पूर्णपणे बंदी घालण्यात आली आहे.
कर्नाटक निपाणी पोलिसांना दिली माहिती
सावंतवाडीचे पोलिस निरीक्षक यांच्या मार्गदर्शनाखाली पोलिस हवालदार प्रवीण वालावलकर आणि लक्ष्मण काळे यांनी संशयिताला हद्दपारीचा आदेश बजावला असून, त्याला जिल्ह्यातून बाहेर करण्याची प्रक्रिया पूर्ण केली आहे. हद्दपारीच्या आदेशानंतर तो सध्या बेळगाव (कर्नाटक) येथील निपाणी या ठिकाणी वास्तव्यास गेला आहे. याबाबत सावंतवाडी पोलिसांमार्फत निपाणी पोलिस ठाण्याला त्याचा तेथील पत्ता आणि वास्तव्याची माहिती अधिकृतपणे कळविण्यात आली आहे, जेणेकरून त्याच्यावर नजर ठेवता येईल.
पोलिस प्रशासनाची कारवाई
सदर गुन्हेगाराविरुद्ध हद्दपारीचा ठोस प्रस्ताव सावंतवाडीचे पोलिस निरीक्षक आणि सहाय्यक पोलिस उपनिरीक्षक निलेश परब यांनी अत्यंत चोखपणे तयार केला होता. वरिष्ठ कार्यालयामार्फत तो प्रांताधिकाऱ्यांकडे सादर करण्यात आला होता. या कारवाईमुळे सावंतवाडी आणि परिसरातील गुन्हेगारी प्रवृत्तींना पोलिसांकडून कडक इशारा देण्यात आला आहे.
