कणकवली : महाराष्ट्र राज्याचे मत्स्य व बंदरे विकासमंत्री तथा सिंधुदुर्ग जिल्ह्याचे पालकमंत्री नितेश राणे यांनी आपल्या वाढदिवसानिमित्त सिंधुदुर्गवासीयांना मोठी भेट देत ओसरगाव टोलसंदर्भात महत्त्वपूर्ण घोषणा केली आहे. जिल्ह्यातील जनतेच्या भावना लक्षात घेऊन ओसरगाव टोल नाक्यावर एमएच-०७ क्रमांकाच्या वाहनांसाठी स्वतंत्र लेन उपलब्ध करून देत विशेष सवलत देण्यात येणार असल्याचे त्यांनी जाहीर केले. तर पिवळी पाटी असणाऱ्या व्यावसायिक गाड्यांना ५० टक्के सवलत दिली जाणार असल्याचे त्यांनी जाहीर केले आहे.
संपूर्ण जिल्ह्यात पालकमंत्री नितेश राणे यांचा वाढदिवस अतिशय उत्साहाने साजरा करण्यात आला. मुंबईत मुख्यमंत्री देवेंद्र फडणवीस यांचे त्यांनी आपल्या वाढदिवसानिमित्त आशीर्वादही घेतले. आपल्या एक्स हँडलवरसुद्धा मुख्यमंत्री देवेंद्र फडणवीस यांनी ‘विधिमंडळातील माझे सहकारी मंत्री नितेश राणे यांना वाढदिवसाच्या हार्दिक शुभेच्छा!’, आज सकाळीच ट्विट करत शुभेच्छा दिल्या होत्या. तर वर्षा निवासस्थानी पालकमंत्री नितेश राणे यांनी मुख्यमंत्र्यांची भेट घेऊन वाढदिवसानिमित्त शुभाशीर्वाद घेतले.
