कुडाळ : पुढारी वृत्तसेवा: कुडाळ तालुक्यातील कवठी-अन्नशांतवाडी येथील गुन्हेगारी पार्श्वभूमी असलेल्या संदिप उर्फ बाळा दामोदर करलकर (वय ५२) याचा राहत्या घरातच खून करण्यात आला. घटनास्थळी उपविभागीय पोलिस अधिकारी विनोद कांबळे यांच्या नेतृत्वाखाली पोलिसांची टीम रवाना झाली आहे. गावात पोलिसांकडून तपास सुरू असुन खुनाचे कारण मात्र, अद्याप गुलदस्त्यात आहे. ही घटना गुरुवारी (दि.२७) सायंकाळी सहाच्या सुमारास घडली. (Sindhudurg Crime News)
कुडाळ तालुक्यातील कवठी-अन्नशांतवाडी ही अति दुर्गम भागात वसलेली वाडी आहे. दहा ते बारा घरे असलेली ही छोटीशी वाडी असून या वाडीत संदिप आपल्या आई-वडिलांसोबत राहत होता. अलीकडे वडिलांचे निधन झाल्यानंतर त्याच्या आईला अपंगत्वाचा झटका आल्यामुळे वडिलांचे दिवस-कार्य आटोपल्यानंतर मृत संदीपच्या छोट्या भावाने आपल्या आईला उपचारासाठी मुंबईला नेले होते. त्यामुळे तो एकटाच घरी राहत होता. त्याची पार्श्वभूमी गुन्हेगारी स्वरूपाची होती. त्याचा कुटुंबातील सदस्यांना सुद्धा त्रास होत होता.
दरम्यान, गुरूवारी संदीप करलकरचा खून झाल्याची माहिती निवती व कुडाळ पोलिसांना मिळाल्यानंतर पोलिसांनी तत्काळ घटनास्थळी धाव घेतली. तत्पूर्वी संदीप करलकर यांचा मुंबई येथे नोकरीनिमित्त राहत असलेला भाऊ संतोष करलकर आपल्या आईचे आधार कार्ड घेऊन जाण्यासाठी आपल्या पुतण्यासमवेत घरी आला, घरी येतात त्याला हा प्रकार निदर्शनास आला.
दरम्यान, पोलिसांची टीमही मृत संदीप करलकर यांच्या घरी दाखल झाली. घरातील समोरच्या व्हरांड्यात रक्तबंबाळ अवस्थेत संदिपचा मृतदेह पडला होता. घटनास्थळी रक्ताचा सडा पडला होता. तसेच घटनास्थळी दुर्गंधी सुटली होती. पोलिसांनी प्राथमिक तपासणी सुरू केली आहे. दरम्यान, खुन्ह्याचा अद्याप तपास लागला नाही. तरी लवकरच त्या खुन्यापर्यत आम्ही पोहचू, असे उपविभागीय पोलीस अधिकारी कांबळे यांनी सांगितले. मृत संदिप याच्या पश्चात आई, भाऊ, पुतण्या असा परिवार आहे.
