सिंधुदुर्ग : ‘फ्लाय-91’ या गोवा स्थित प्रादेशिक विमान कंपनीने सिंधुदुर्ग (चिपी) विमानतळावरून हैदराबाद आणि बेंगळुरू या शहरांसाठी थेट विमानसेवा सुरू केली आहे. ही सेवा आठवड्यातून चार वेळा उपलब्ध आहे. सध्या या कंपनीची सिंधुदुर्ग-पुणे ही विमानसेवा सुरू असून त्यात आणखी या दोन नवीन मार्गांचा समावेश झाला आहे. यामुळे सिंधुदुर्गवासीयांना थेट विमानाने हैद्राबाद व बेंगळूर या दोन महत्वाच्या शहरांना जाण्याची सुविधा उपलब्ध झाली आहे.
प्रवाशांचा प्रवास अधिक सुकर, आरामदायक आणि अखंड करण्याच्या उद्देशाने ‘फ्लाय-91’ ने एक महत्त्वपूर्ण पाऊल उचलले आहे. कंपनीने सिंधुदुर्ग (चिपी) विमानतळ ते गोवा (पणजी) दरम्यान मोफत कोच सेवा सुरू केली असून, त्यामुळे प्रवाशांना अंतिम गंतव्यापर्यंत पोहोचणे अधिक सुलभ झाले आहे. ही कोच सेवा ‘फ्लाय-91’ ची टियर 2 आणि टियर 3 शहरांना जोडण्याची कटिबद्धता दर्शविते.
प्रादेशिक हवाई प्रवास अधिक सुलभ व त्रासमुक्त बनवणे हेच आमचे मुख्य उद्दिष्ट आहे. गोवा मार्गे सिंधुदुर्ग विमानतळाशी जोडणार्या या कोच सेवेची सुरुवात ही त्या दिशेने टाकलेले एक महत्त्वपूर्ण आणि विचारपूर्वक पाऊल आहे, असे ‘फ्लाय-91’ चे मुख्य कार्यकारी अधिकारी आणि व्यवस्थापकीय संचालक मनोज चाको यांनी या कोच सेवेच्या शुभारंभ प्रसंगी सांगितले.
सिंधुदुर्ग विमानतळ आणि गोवा यांच्यातील ‘लास्ट-माईल’ कनेक्टिव्हिटी ही लक्झरी कोच सेवेमुळे सुनिश्चित होत आहे. यामुळे पुण्यातील प्रवाशांना सहजतेने पणजीपर्यंत पोहोचता येईल, तसेच गोव्यातील प्रवाशांना पुण्याकडे परत जाण्यासाठी सिंधुदुर्ग विमानतळापर्यंतचा प्रवास अधिक सुलभ होईल. सुरुवातीच्या काळात ही सेवा ठरावीक कालावधीसाठी मोफत दिली जाईल आणि नंतर प्रवाशांच्या सोयीसाठी अत्यल्प शुल्कात उपलब्ध केली जाईल, असे सिंधुदुर्ग विमानतळाचे मुख्य सल्लागार कॅप्टन जयसिंग सदाना यांनी सांगितले.
