सावंतवाडी : मुलीचे फोटो सोशल मिडियावरील इंस्टाग्राम व फेसबुक वर व्हायरल करून बदनामी केल्याप्रकरणी सावंतवाडी पोलिसांनी सायबर सेलच्या मदतीने प्रतीक दिनानाथ गावकर (28, रा. मळगाव गावकरवाडी)याला सोमवारी ताब्यात घेतलेे. याबाबत मुलीने मे महिन्यात तक्रार दिली होती, त्यावरून त्याच्यावर गुन्हा दाखल करण्यात आला. त्याला अटक करून मंगळवारी न्यायालयात हजर करण्यात येणार आहे.
संशयित प्रतीक गावकर याने सोशल मीडिया फेसबुक व इंस्टाग्राम अकाउंटवर एका मुलीचे फोटो अश्लील पद्धतीने पोस्ट करून तिची बदनामी केली होती. हा गुन्हा मे महिन्यात उघडकीस आला होता.याप्रकरणी पोलीस ठाण्यात धाव घेत त्या मुलीने तक्रार दिली त्यानुसार संशयित युवकावर सायबर कायदा आणि विनयभंग केल्याप्रकरणी गुन्हा दाखल करण्यात आला होता. संशयित प्रतीक गावकर याला पोलिसांच्या सायबर सेलच्या मदतीने शोधण्यात पोलिसांना अखेरीस यश आले.
संशयित कामानिमित्त मुंबई येथे असतो तो मळगाव- गावकरवाडी येथे आपल्या घरी येऊन-जाऊन असतो. सोमवारी तो घरी आला असता त्याला पोलिसांनी ताब्यात घेतले. संशयिताने गुन्ह्याची कबुली दिली असून हा प्रकार त्याने का केला? याबाबत पोलिसांना त्याने माहिती दिलेली नाही. अधिक तपास महिला पोलीस अधिकारी माधुरी मुळीक करत आहेत. मंगळवारी त्याला अटक करून न्यायालयात हजर करण्यात येणार आहे.
