Kudal village elections 2025
कुडाळ : कुडाळ तालुक्यातील ६८ ग्रामपंचायतचे सन २०२५-३० या कालावधीसाठीचे सरपंच आरक्षण सोडत कुडाळ तहसीलदार वीरसिंग वसावे यांनी जाहीर केली. या आरक्षण सोडतीमुळे काही इच्छुक उमेदवारांच्या मनासारखी आरक्षणे न पडल्यामुळे काहींचे चेहरे उदास झाले. तर काहींच्या बाजूने अपेक्षेप्रमाणे आरक्षण पडल्यामुळे त्यांना अनपेक्षित सुखद धक्का बसला. ते आनंदीत झाल्याचे चित्र सभागृहात दिसून आले. काही इच्छुकांनी तर फोनवरूनच आरक्षणाची माहिती घेतली.
कुडाळ येथील सिद्धिविनायक हॉलमध्ये मंगळवारी सरपंच आरक्षण सोडतची चिठ्ठी कुडाळ तहसीलदार वीरसिंग वसावे यांच्या प्रमुख उपस्थितीत कुडाळ पडतेवाडी शाळेमधील इयत्ता पहिली मधील ऋत्वी रुपेश धुरी व चैत्राली अविनाश वारंग या दोन मुलींच्या हस्ते काढण्यात आली. यामध्ये अनु. जाती (महिला)-३, अनु.जाती सर्वसाधारण-२, अनुसूचित जमाती-१, नामाप्र-९,नामाप्र (महिला)-९, खुला प्रवर्ग -२२, खुला प्रवर्ग (महिला)-२२ असे ६८ ग्रामपंचायतीच्या सरपंच पदासाठीचे आरक्षण जाहीर करण्यात आले.
अनु जाती (महिला)- बांबुळी, वाडीवरवडे, आंबडपाल
अनु.जाती सर्वसाधारण- रानबांबुळी, निरूखे,
अनुसूचित जमाती-आंब्रड, नागरिकांचा मागास प्रवर्ग- घोटगे, वसोली, ओरोस बुदुक, हुमरमळा-वालावल, माडयाचीवाडी, गोठोस, पुळास, कसाल, केरवडे तर्फ माणगाव,
नागरिकांचा मागास प्रवर्ग (महिला)- -पावशी, मांडकुली, हुमरमळा-अणाव, पिंगुळी, निवजे, तुळसुली कर्याद नारुर, नानेली, माणगाव, गोवेरी
खुला प्रवर्ग - भरणी, भडगाव बुद्रुक, नारुर कर्याद नारुर, गावराई, सरंबळ, र्सेबांबर्डे, कुपवडे, वेताळ बांबर्डे, बिबवणे, हिर्लोक, कालेली, केरवडे कर्याद नारुर, घावनळे, परबवाडा पाट, सोनवडे तर्फ कळसुली, वाडोस, नेरुर कर्याद नारुर, साळगांव, आवळेगांव -ओरोस खुर्द, डिगस, कवठी, सोनवणे तर्फे हवेली
खुला प्रवर्ग- (महिला)-तेंडोली, वालावल, आंदुर्ले, झाराप, चेंदवण, पणदूर, पोखरण-कुसबे, हुमरस, कुंदे, मुळदे, पांग्रड, तुळसुली तर्फ माणगांव, शिवापूर, पडवे, कडावल, आकेरी, बांव, वर्दे, गिरगांव- कुसगाव, अणाव,जांभवडे, नेरुर देऊळवाडा.
यावेळी अमरसेन सावंत, संदिप राणे, आर.के.सावंत, नागेश आईर, अतुल बंगे, तानाजी पालव, गोठ्या चव्हाण, समाधान परब, शृगारे, सचिन धुरी, राजन भगत, विनायक राणे आदी सह पदाधिकारी, कार्यकर्ते, नागरिक उपस्थित होते.
कुडाळ तालुक्यात ६८ ग्रामपंचायतीआहेत. यावेळी काही नागरिक पदाधिकाऱ्यांनी सूचना केल्या, हरकती मांडल्या; त्या सर्वांचे आम्ही याच ठिकाणी निरसन केले असल्याची माहिती कुडाळ तहसीलदार वीरसिंग वसावे यांनी दिली. यावेळी निवासी नायब तहसीलदार अमरसिंग जाधव, महसूल नायब तहसीलदार संजय गवस, निवडणूक नायब तहसीलदार प्रमोद पिळणकर आदीसह महसुली कर्मचारी आदी उपस्थित होते. कुडाळ पोलिस निरीक्षक राजेंद्र मगदूम यांनी यावेळी भेट दिली.
दरवेळी हेच्याच बाजूने आरक्षणा कशी पडतत? मग त्यांच्याबरोबर रवान आमका काय गावता? आमका पण वाटता ना कधीतरी सरपंच होवचा, आतापर्यंत आम्ही हेचे झेंडे फिरवलंव, नाचवलव, आता सुध्दा तीच परिस्थिती ईलीहा, मग काय उपयोग ? अशा उत्स्फूर्त प्रतिक्रिया आरक्षण सोडती नंतर हॉलमध्ये ग्रामीण भागातून आलेल्या नागरिकांमधून उमटल्या होत्या.
