सावंतवाडी : महायुतीचे घटक असूनही आम्हाला विचारात घेतले जात नाही. सिंधुदुर्ग जिल्ह्यात सध्या भाजप आणि शिंदे गट यांच्यात सुरू असलेल्या अंतर्गत संघर्षाच्या पार्श्वभूमीवर आम्ही किती वाट पाहावी? असा संतप्त सवाल करत राष्ट्रवादी काँग्रेसच्या सावंतवाडी तालुका युनिटने महायुतीला 15 नोव्हेंबरपर्यंत निर्णय घेण्यासाठी मुदत दिली आहे. तर सावंतवाडी नगराध्यक्ष पदासाठी पक्षाच्या उमेदवार म्हणून उल्का उमाकांत वारंग यांची घोषणा सावंतवाडी तालुकाध्यक्ष उदय भोसले यांनी पत्रकार परिषदेत केली.
या मुदतीनंतर पक्ष कठोर भूमिका घेणार असून, आम्ही सावंतवाडी न. प. च्या सर्व 20 जागांवर उमेदवार उभे करणार आहोत तसेच, आगामी निवडणुकीत नगरसेवक आणि नगराध्यक्ष पदासाठी आमचे संभाव्य उमेदवार पूर्ण तयारीने उतरतील, अशी माहिती राष्ट्रवादी काँग्रेसचे तालुकाध्यक्ष उदय भोसले यांनी दिली आहे. नगराध्यक्ष पदासाठी पक्षाने उल्का उमाकांत वारंग यांचे नाव निश्चित केले आहे.
सावंतवाडी येथील राष्ट्रवादी काँग्रेस पक्षाच्या कार्यालयात आयोजित पत्रकार परिषदेत बोलताना श्री. भोसले यांनी महायुतीतील नेत्यांवर नाराजी व्यक्त केली.महायुतीचे भाग असूनही आम्हांला कोणत्याही प्रकारे विचारले जात नाही.14 नोव्हेंबरपर्यंत निर्णय घेण्याचा अल्टिमेट दिला असून.मुदत संपताच सावंतवाडीच्या20 जागांवर उमेदवार उभे करणार आणि त्याच वेळेला नगराध्यक्षपदाचा चेहरा म्हणून उल्का उमाकांत वारंग यांचेही नामनिर्देशन पत्र भरणार असल्याचे त्यांनी सांगितले.
सावंतवाडी विधानसभा अध्यक्ष उमाकांत वारंग यांनीही आपली भूमिका स्पष्ट केली. ते म्हणाले, “महायुतीचे दोन्ही पक्ष जर आम्हांला कमी लेखण्याची चूक करत असतील, तर महायुतीला त्याची उत्तरे आगामी काळात मतदार मतपेटीतून नक्कीच देणार आहेत. केवळ शिंदे गट आणि भारतीय जनता पार्टी हे सर्वस्व नाहीत.
आमचा पक्ष कुठेही कमी नाही, त्यामुळे त्यांनी आम्हांला कधीही कमी लेखू नये, असा इशारा त्यांनी दिला. सावंतवाडी विधानसभा अध्यक्ष उमाकांत वारंग, प्रदेश चिटणीस सुरेश गवस, जिल्हा उपाध्यक्ष एम.डी. सावंत, अल्पसंख्यांक विभागाचे प्रदेश महासचिव शफिक खान, संपर्क प्रमुख (मंत्री हसन मुश्रीफ यांचे वतीने) अनंतराज पाटकर, महिला तालुकाध्यक्ष रिद्धी परब, शहराध्यक्ष ऑगस्टीन फर्नांडिस, महिला जिल्हा उपाध्यक्ष रंजना निर्मल, जिल्हा उपाध्यक्ष मानसी देसाई, जिल्हा उपाध्यक्ष गुरुदत्त कामत,अॅड. सत्यवान चेंदवणकर, दीपक देसाई, सत्यजित देशमुख, सत्यप्रकाश गावडे, सतीश नाईक, डॉ. तुषार भोसले यांसह अन्य मान्यवर उपस्थित होते.
