Sindhudurg : मंत्री नितेश राणे यांनी केली पंढरपूरची पायीवारी

कणकवली ः राज्याचे मत्स्य व्यवसाय व बंदरे विकास मंत्री तथा सिंधुदुर्गचे पालकमंत्री नीतेश राणे यांनी शुक्रवारी वाखरी ते पंढरपूर या मार्गावर संत ज्ञानेश्वर माऊलींच्या पायी वारीत सहभागी होत पायी वारी केली. यावेळी ज्ञानेश्वर माऊलींच्या पालखी सोहळ्यातील अश्वाचे दर्शन घेतले तसेच रिंगण सोहळ्यात सहभाग घेतला आणि ज्ञानेश्वर माऊलींची पालखी खांद्यावर घेतली.

आषाढी एकादशी निमित्त पंढरपुरात विविध भागातून वारकरी भक्ती भावाने सहभागी होत असतात. पांडुरंगाच्या दर्शनाची आस लागलेले हे भक्तगण वारीच्या माध्यमातून आपल्या लाडक्या विठुरायाचे दर्शन घेत पांडुरंग चरणी लीन होतात. अशा या भक्तीमय वातावरणात या पायी दिंडीत मंत्री नितेश राणे सहभागी झाल्याने वारकर्‍यांमध्येही आनंद व उत्साहाचे वातावरण निर्माण झाले. वारकर्‍यांच्यावतीने मंत्री नितेश राणे यांचा सत्कार करण्यात आला.