मालवण : लग्न जुळवते असे आमिष दाखवून मालवण येथील तरुणाची लाखों रुपये आर्थिक फसवणूक केल्या प्रकरणी वेंगुर्ले येथील श्रद्धा दीपक वालावलकर या महिलेला मालवण पोलिसांनी अटक केली. गुन्हा दाखल झाल्या नंतर 12 तासात पोलिसांनी तिला ताब्यात घेतले. मालवण येथील एका तरुणाशी सोशल मीडियाच्या माध्यमातून ओळख करून संशयित महिलेने त्याला त्याचे लग्न जुळविण्याचे आमिष दाखवून त्याला सुमारे 1 लाख 63 हजार रूपयांचा गंडा घातला होता.
या प्रकरणी त्या तरुणांने मालवण पोलिसा दिलेल्या तक्रारी नुसार गुन्हा दाखल करण्यात आला होता. पोलिस अधीक्षक डॉ. मोहन दहिकर, अति. पोलीस अधीक्षक कृषिकेश रावले आणि कणकवलीचे उपअधीक्षक घनश्याम आढाव यांनी गुन्ह्याच्या तपासा अनुषंगाने तात्काळ तपास पथक रवाना केले होते. वरिष्ठांच्या मार्गदर्शनाखाली तसेच गोपनीय माहितीच्या आधारे नमूद गुन्ह्यतील संशयीत श्रद्धा वालावलकर हिला वेंगुर्ले पोलिसांच्या मदतीने पकडले.
मालवण पोलिस निरीक्षक प्रवीण कोल्हे यांच्या नेतृत्वातील उपनिरीक्षक विलास टेंबुलकर, सहा.स उप निरीक्षक आरती खोबरेकर, हवालदार सुशांत पवार, महादेव घागरे यांच्या पथकाने ही कार्यवाही केली. सोमवारी तिला मालवण न्यायालयासमोर हजर करण्यात येणार आहे. संशयित महिलेने सिंधुदुर्ग जिल्ह्यामध्ये वेंगुर्ले, कुडाळ, सावंतवाडी पोलीस ठाणे हद्दीत गुन्हे केल्याचे निष्पन्न झालेले आहे. त्या दृष्टीनेही तपास केला जाणार आहे. अशी माहिती मालवण पोलिसांनी दिली.
संशयित महिलेने आपल्या एका नातेवाईक तरुणीचा फोटो सोशल मीडिया डीपीला लावून तरुणांशी ओळख वाढवून त्यांची फसवणूक केली. मालवण येथील तरुणांचीही अशीच फसवणूक करण्यात आली आहे.
