मळगाव : कोकणात सुरू असलेल्या मुसळधार पावसामुळे कोकण रेल्वेचे वेळापत्रक अजूनही कोलमडलेले आहे. यामुळे कोकण रेल्वे मार्गावरील बऱ्याच गाड्या ६ ते ७ तास विलंबाने धावत आहेत. दिवा-सावंतवाडी व सीएसएमटी-मडगाव मांडवी एक्स्प्रेस नियोजित वेळेपेक्षा सहा तासाने सावंतवाडी स्टेशनला विलंबाने दाखल झाली. यामुळे प्रवाशी संतप्त झाले आहेत.
मुंबई-मडगाव कोकणकन्या एक्स्प्रेस, एलटीटी मडगाव एक्स्प्रेस, दिवा-सावंतवाडी एक्स्प्रेस, मांडवी एक्स्प्रेस या गाड्यांना पुनर्नियोजित वेळेनंतर सुमारे सहा ते सात तास उशीर झाल्याने जनशताब्दी, तुतारी, मांडवी आणि कोकणकन्या या गाड्या सातत्याने उशिराने धावत आहेत. मंगळवारी मुंबई-मडगाव कोकणकन्या एक्स्प्रेस तब्बल सात तास उशिराने सावंतवाडी येथे पोहोचली. तर, एलटीटी-मडगाव गाडी सुमारे तीन तास उशिराने धावत होती. मुंबई-मडगाव मांडवी एक्सप्रेस सुमारे सव्वा तास उशिराने धावत होती.
