कणकवली ः कणकवली शहरात टेबवाडी येथे सुपर बाजारच्या मागील शेतात शनिवारी सायंकाळी 5 जनावरांचा अचानक मृत्यू झाला. त्यानंतर रविवारी सकाळी आणखी एक जनावर मृत अवस्थेत त्याच परिसरात सापडून आले. नेमका मृत्यू कसा झाला हे माहीत नसलं तरी वैद्यकीय अधिकारी यांनी विषबाधा झाल्याचा प्राथमिक अंदाज व्यक्त केला होता.
मृत जनावरांमध्ये दोन दुधाळ, एक रेडा, एक गाभण, एक गाय आणि एका पाडीचा समावेश आहे. अचानक 6 जनावरे मृत झाल्याने कणकवली फौजदारवाडी येथील शेतकरी राकेश अशोक राणे यांचे सुमारे साडेतीन लाखांचे नुकसान झाले आहे. पाळीव जनावरे अचानक मृत झाल्याने शेतकरी राकेश राणे यांच्यावर दुःखाचा डोंगर कोसळला. याची माहिती मिळताच कणकवलीचे नगराध्यक्ष संदेश पारकर यांनी घटनास्थळी भेट देऊन पाहणी केली. त्यांनी पीडित शेतकरी राकेश राणे यांची भेट घेऊन त्यांना धीर दिला. नगरसेवक जयेश धुमाळे, नगरसेविका आर्या राणे, मेघा सावंत, महेश सावंत, बंडू हर्णे, सुजीत जाधव, बाळू पारकर यांच्यासह नगरपंचायत कर्मचारी उपस्थित होते. शवविच्छेदनानंतर नेमका या 6 जनावरांचा मृत्यू कसा झाला हे उघड होणार आहे.
