ओरोस ः बाळासाहेबांची शिवसेना हीच खरी शिवसेना आहे, म्हणूनच विधानसभा निवडणुकीत धनुष्यबाण निशाणीवर शिवसेनेचे 57 आमदार व अपक्ष तीन आमदार निवडून आले. या जिल्ह्यात मी स्वतः व आ. दीपक केसरकर विजय झालो. हे सर्व आपल्यासारख्या कार्यकर्त्यांमुळे व जनतेमुळे शक्य झाले आहे. म्हणूनच जनतेचे आभार मानण्याासाठी उपमुख्यमंत्री तथा शिवसेना मुख्य नेते एकनाथ शिंदे 24 एप्रिल रोजी जिल्ह्यात येत आहेत. त्यांच्या स्वागतासाठी कार्यकर्त्यांसह जनतेने उस्फूर्त सहभागी व्हावे, तसेच शिवसेना सदस्य नोंदणी करावी, असे आवाहन आ. नीलेश राणे यांनी केले.
सिंधुदुर्गनगरी येथे शिवसेना कार्यालयात आ. नीलेश राणे यांनी शिवकार्य सदस्य नोंदणीचा शुभारंभ केला. जिल्हाप्रमुख दत्ता सामंत, संजय आंग्रे, संजू परब, संजय पडते, सौ. दीपलक्ष्मी पडते, सचिन वालावलकर आदी नेत्यांसह शिवसेना पदाधिकारी व कार्यकर्ते, सरपंच लोकप्रतिनिधी उपस्थित होते.
उपमुख्यमंत्री एकनाथ शिंदे यांच्यामुळे मला संधी मिळाली व आपल्या सर्वांच्या आशीर्वादामुळे मी आमदार झालो. संघटनात्मक ताकद काय असते हे प्रत्येकाला समजले आहे. शिवसेना पक्ष कार्यकर्त्याला प्रेरणा आणि उत्साह देणारा असून हा पक्ष संघटित व्हावा, आणखी मजबूत हवा, यासाठी या पक्षाची सदस्य नोंदणी महत्त्वाची आहे. जिल्ह्यात आपले दोन आमदार असून ही संघटनात्मक ताकद मोठी करण्यासाठी आपली सर्वांची जबाबदारी आहे. म्हणूनच उपमुख्यमंत्री एकनाथ शिंदे येण्यापूर्वी या जिल्ह्यात 50 हजार सदस्य नोंदणी करण्यासाठी प्रत्येक कार्यकर्त्यांनी काम करावे.
कुडाळ-मालवण मतदारसंघात 30 हजार, सावंतवाडीमध्ये यापूर्वी सदस्य नोंदणी झालेली असल्यामुळे आणखी 10 हजार व कणकवली मध्ये 10 हजार अशी सदस्य नोंदणी करा. लवकरच आपण सदस्य नोंदणी दोन लाखाच्यावर करू, यासाठी सर्वांनी काम करा, बूथ प्रमुख, शिवदूत या सर्वांनी यात उस्फूर्त सहभागी व्हा, संघटनात्मक ताकद वाढली की आपोआप आपली ताकद वाढली असे समजा. कोणतेही चुकीचे काम करू नका असे आवाहन आ.नीलेश राणे यांनी केले.
संजू परब, दत्ता सामंत, संजय पडते यांचे मार्गदर्शन झाले. यावेळी शिवकार्य सदस्य नोंदणीच्या फॉर्मचे वितरण करण्यात आले.
