मालवण : पुढारी वृत्तसेवा
राजकोट येथील छत्रपती शिवाजी महाराजांचा पुतळा कोसळण्याप्रकरणी पुतळा बनवणाऱ्या कोल्हापूरच्या रचना सल्लागार डॉ. चेतन पाटील यांना पोलिसांकडून अटक करण्यात आली होती. रचना सल्लागार डॉ. चेतन पाटील याला शनिवारी (दि.31) दुपारी येथील न्यायालयात हजर करण्यात आले होते. यानंतर सरकारी वकील आणि आरोपींच्या वकिलांचा युक्तिवादानंतर न्यायाधीश एम. आर. देवकाते यांनी संशयित आरोपी डॉ. पाटील याला ५ सप्टेंबरपर्यंत पोलीस कोठडी सुनावली आहे. शनिवारी दुपारी 2.45 वाजता संशयीत आरोपी चेतन पाटील याला आज मालवण पोलिसांनी न्यायालयात हजर केले. यावेळी पोलिस स्टेशन आवारात व मालवण न्यायालयाच्या बाहेर पोलीस बंदोबस्त ठेवण्यात आला होता.
26 ऑगस्ट रोजी शिवरायांचा पुतळा कोसळला
पंतप्रधान नरेंद्र मोदी यांच्या हस्ते अनावरण करण्यात आलेला मालवण राजकोट येथील छत्रपती शिवाजी महाराजांचा पूर्णाकृती पुतळा सोमवारी (दि.26) कोसळला. परिसरात झालेल्या मुसळधार पाऊस व वादळी वाऱ्याच्या झोतात कोसळला अशी माहिती सांगण्यात येत आहे.
