मसुरे : प्रति पंढरपूर म्हणून दक्षिण कोकणात ओळखल्या जाणार्या व लाखो भाविकांच्या नवसास पावणार्या आंगणेवाडी येथील श्री देवी भराडी देवीची जत्रा सोमवार, 9 फेब्रुवारी 2026 रोजी होणार आहे. बुधवारी सकाळी देवीचा हुकूम घेऊन या यात्रेची तारीख निश्चित करण्यात आली.
आंगणेवाडी जत्रा कोणत्याही तिथीवर अवलंबून नसते. तर देवीचा कौल घेऊनच यात्रेचा दिवस ठरविण्यात येतो. यावर्षी सुमारे 8 ते 10 लाखांपेक्षा जास्त भाविक या यात्रेस उपस्थिती दर्शवतील, असा अंदाज आहे. आंगणेवाडीत येणारे लाखो भाविक देवीच्या दर्शनाची आस घेऊन येतात. वस्त्रालंकारांनी सजविलेली देवी ‘याची देही, याची डोळा’ पाहून जीवनाचे सार्थक झाल्याचा अनुभव भाविकांना येतो. प्रतिवर्षाप्रमाणे भाविकांना कोणत्याही प्रकारची गैरसोय न होता आई भराडी मातेचे सुलभ दर्शन होण्यासाठी आंगणे कुटुंबीय या यात्रेचे नियोजन करणार असल्याची माहिती मंडळाचे अध्यक्ष छोटू आंगणे यांनी दिली. अनेक व्यापारी, व्यावसायिक यांना रोजगार उपलब्ध करुन देणार्या या यात्रोत्सवामध्ये मोठ्या प्रमाणात मुंबईकर चाकरमानी उपस्थिती दर्शवितात.
आंगणेवाडी जत्रेची तारीख निश्चित होताच रेल्वे तसेच खाजगी वाहनांच्या बुकिंग साठी गर्दी सुरू झाली. राजकीय क्षेत्रातील सर्व पक्षिय नेते या यात्रेस उपस्थिती दर्शवीत असल्याने ग्रामस्थ मंडळा बरोबरच शासनाची सुद्धा या यात्रेच्या नियोजनासाठी एक प्रकारची कसोटी लागते. जत्रेची तारीख आता जाहीर झाल्याने पूर्व तयारीस लवकरच प्रारंभ होणार आहे.
जत्रेची तारीख ठरविण्याचा कौल झाल्यानंतर श्री देवी भराडी मंदिर 2 ते 4 डिसेंबर असे तीन दिवस धार्मिक विधीसाठी बंद राहणार आहे. या कालावधीत मंदिरात कुणालाही प्रवेश दिला जाणार नाही.
6 डिसेंबर ते 8 फेब्रुवारी 2026 या कालावधीत भाविकांना फक्त देवीचे दर्शन घेता येणार आहे. या कालावधीत देवीची ओटी भरणे बंद राहणार आहे. यात्रेदिवशी म्हणजे 9 फेब्रुवारी 2026 पासून ओट्या भरणे पूर्ववत चालू होणार आहे. याची भाविकांनी नोंद घेण्याचे आवाहन आंगणे कुटुंबीयांनी केले आहे.
