देवगड : मुणगे समुद्रात खोल पाण्यात अनधिकृत मासेमारी करणाऱ्या 'श्री महालक्ष्मी- ३' या परप्रांतीय नौकेवर सोमवारी रात्री ११.३९ वाजताच्या सुमारास कारवाई करण्यात आली. मत्स्य व्यवसाय विभागाच्या अंमलबजावणी अधिकारी तथा सहाय्यक मत्स्य विकास अधिकारी तेजस्विता करंगुटकर यांच्या पथकाने मालवण पोलिसांच्या मदतीने ही कारवाई केली. या नौकेवर तांडेलासह एकूण सात खलाशी होते. मत्स्य व्यवसाय विभागाने ही नौका ताब्यात घेऊन ती कारवाईसाठी मालवण-सर्जेकोट बंदरात ठेवली आहे.
सहाय्यक मत्स्य विकास अधिकारी श्रीमती करंगुटकर या पथकासमवेत समुद्रात गस्त घालत असताना कर्नाटक राज्याच्या जलधी क्षेत्रासाठी परवाना असलेली नौका अनधिकृतरित्या मासेमारी करताना आढळून आली. ही नौका वेदवती पुथरण (रा. मारीकंबा नगर थोत्तम उडपी, रा. कर्नाटक) यांच्या मालकीची असल्याचे तपासणीअंती स्पष्ट झाले. त्यामुळे या नौकेवर अनधिकृत मासेमारी केल्याप्रकरणी महाराष्ट्र सागरी मासेमारी (नियमन) अधिनियम १९८१ व सुधारणा अधिनियम २०२१ अंतर्गत कारवाई करण्यात आली. ही कारवाई मत्स्य मालवण पोलीस ठाण्याचे पोलीस कर्मचारी अमित हरमलकर, सागरी सुरक्षा पर्यवेक्षक मालवण - सर्जेकोट तसेच सागरी सुरक्षा रक्षक मालवण व देवगड यांच्या सहकार्याने व सहाय्यक आयुक्त मत्स्य व्यवसाय – सिंधुदुर्ग यांच्या मार्गदर्शनाखाली करण्यात आली.
