वेंगुर्ले : पुढारी वृत्तसेवा
सन 2025 ते 2030 या कालावधीत होणाऱ्या वेंगुर्ले तालुक्यातील एकूण 30 ग्रामपंचायतींच्या सरपंच पदांचे आरक्षण सोडत मंगळवार दिनांक 8 एप्रिल रोजी सकाळी 11 वाजता तहसीलदार कार्यालय वेंगुर्ले येथे करण्यात येणार आहे, अशी माहिती तहसीलदार ओंकार ओतारी यांनी दिली.
मुंबई ग्रामपंचायत (सरपंच व उपसरपंच) निवडणूक नियम 1964 मध्ये सरपंच पदाच्या आरक्षणाबाबत सुधारित तरतुदी निश्चित केल्या आहेत. सिंधुदुर्ग जिल्ह्यातील ग्रामपंचायतीच्या प्रवर्गनिहाय सरपंचांची पदे ग्रामविकास विभाग मंत्रालय मुंबई यांचेकडील महाराष्ट्र शासन राजपत्र असाधारण भाग चार ब, दिनांक ५ मार्च २०२५ अन्वये सन 2025 ते 2030 या कालावधीत होणाऱ्या ग्रामपंचायतीच्या सार्वत्रिक निवडणुका विचारात घेऊन निश्चित केली असून, त्यांचे तालुका निहाय वाटप निश्चित करण्यात आले आहे.
वेंगुर्ले तालुक्यातील सरपंच पदे जिल्हाधिकारी सिंधुदुर्ग यांचेकडील पत्र अन्वये 28 मार्च २०२५ अन्वये आरक्षित करून देण्यात आलेली आहेत. तालुक्यातील 30 ग्रामपंचायतींपैकी अनुसूचित जातीसाठी आरक्षित १ सरपंच पद हे प्रवर्गासाठी असणार आहे. नागरिकांच्या मागास प्रवर्गासाठी एकूण ८ पदे आरक्षित होणार असून त्यात ४ जागा प्रवर्गासाठी व ४ महिलांसाठी आरक्षित असणार आहेत.
उर्वरित 21 सरपंच पदे ही खुलासाठी असणार असून त्यात 10 पदे प्रवर्गासाठी व 11 पदे महिलांसाठी आरक्षित होणार आहेत. तरी तालुक्यातील सर्व सरपंच, उपसरपंच, ग्रामपंचायत सदस्य, माजी जि.प.सदस्य, पं.स. सदस्य, लोकप्रतिनिधी, पदाधिकारी व नागरीकांनी उपस्थित रहावे, असे आवाहन तहसिलदार ओंकार ओतारी यांनी केले आहे.
