देवरुख : संगमेश्वर तालुक्यातील कडवई येथे एका 70 वर्षीय वृद्धेचा निर्दयीपणे खून झाल्याची धक्कादायक घटना समोर आली आहे. या प्रकरणी संगमेश्वर पोलिसांनी एका संशयित आरोपीला ताब्यात घेतले असून, अन्य दोन आरोपी फरार झाले आहेत. पोलीस त्यांचा कसून शोध घेत आहेत. बानू फकीर महमद जुवळे (70, रा. कडवई) असे खून झालेल्या वृद्धेचे नाव आहे. अंगावरील दागिन्यांसाठी हा निर्घृण खून केल्याचे तपासात पुढे आले आहे.
बानू फकीर मोहम्मद जुवळे या 2 मे 2025 पासून बेपत्ता असल्याची तक्रार त्यांची चुलत सून मुनीरा बशीर जुवळे यांनी संगमेश्वर पोलिस ठाण्यात दाखल केली होती. पोलिसांनी तत्काळ बेपत्ता नोंद घेऊन तपास सुरू केला. पोलिस अधीक्षक, अपर पोलिस अधीक्षक आणि उपविभागीय पोलिस अधिकार्यांच्या मार्गदर्शनाखाली पोलिसांनी या प्रकरणाचा कसून तपास केला. मोबाईल नंबरचे तांत्रिक विश्लेषण आणि सीसीटीव्ही फुटेजच्या आधारे पोलिसांना महत्त्वाचे धागेदोरे मिळाले. 2 मे 2025 रोजी हाजीरा मुसा माखजनकर, रिजवान महमूद जुवळे (दोघे रा. कडवई) आणि हमायु शकील काझी (रा. फणसवणे) यांनी संगनमताने टाटा नॅनो गाडी (एम. एच. 05 ए. एक्स. 9098) मधून बानू जुवळे यांचे अपहरण केल्याचे निष्पन झाले. या माहितीच्या आधारे, मुनीरा बशीर जुवळे यांच्या फिर्यादीनुसार संगमेश्वर पोलिस ठाण्यात गुन्हा दाखल करण्यात आला.
गुन्ह्यातील आरोपी रिजवान महमूद जुवळे हा सीवूड्स, मुंबई येथे असल्याची गोपनीय माहिती पोलिसांना मिळाली. त्यानुसार पोलीस पथकाने तत्काळ कारवाई करत त्याला ताब्यात घेतले तर हाजीरा माखजनकर आणि हमायू काझी हे आरोपी फरार आहेत. ताब्यात घेतलेल्या आरोपीस संगमेश्व पोलिस ठाण्यात आणल्यानंतर आरोपीकडे कसून चौकशी केली असता, त्याने गुन्ह्याची कबुली दिली. या घटनेत रिजवान जुवळे, हुमायू शकील काझी आणि हाजीरा मुसा माखजनकर यांनी संगनमताने बानू फकीर मोहम्मद जुवळे यांचे अपहरण केले. त्या नंतर रिजवान जुवळे आणि हुमायू शकील काझी यांनी तिचा गळा दाबून खून केला आणि तिच्या अंगावरील दागिने काढून घेतले. यानंतर पुरावे नष्ट करण्याच्या उद्देशाने मृतदेह नॅनो गाडीतून कडवई ते कुंभारखाणी बुद्रुक जाणार्या रोडवरील खिंडीतील जंगलमय भागात खोल दरीत फेकून दिला. 23 मे 2025 रोजी पोलिस कोठडीत असताना आरोपी रिजवान जुवळे याने घटनास्थळी मृतदेह दाखवला तसेच आरोपींनी महिलेच्या अंगावरून काढलेले सोन्याचे दागिने त्यांनी विकलेल्या सोनाराकडून जप्त करण्यात आले आहेत.
