रत्नागिरी ः रत्नागिरीच्या मिरजोळे येथील प्रेयसी भक्ती मयेकर खुनातील प्रियकर आरोपी दुर्वास पाटील आणि विश्वास पवार यांनी तिसर्या एका साथीदाराच्या मदतीने देशी बारमधील वेटरचा गळा आवळून खून केल्याचे तपासादरम्यान उघड झाले. या वेटरच्या खुनातील तिसरा आरोपी नीलेश रमेश भिंगार्डे 35, रा. इस्लामपूर, जि. सांगली) याला जयगड पोलिसांनी अटक केली आहे. या आरोपीलाही 8 सप्टेंबरपर्यंत पोलिस कोठडीत ठेवण्याचे आदेश न्यायालयाने दिले आहेत.
विवाहासाठी तगादा लावणार्या प्रेयसीचा केबलने गळा आवळून तिला आंबा घाटातील दरीत फेकून देण्याच्या आरोपाखाली खंडाळ्यातील देशी बार मालक दुर्वास पाटील याच्यासह बारचा मॅनेजर विश्वास पवार आणि सुशांत नरळकर यांना शहर पोलिसांनी अटक केली. या तिघांच्या चौकशीत या आरोपींनी दुर्वास पाटीलच्या मालकीच्या बारमधील वेटरचाही अशाच पद्धतीने खून केल्याचे निष्पन्न झाले होते. या गुन्ह्यामध्ये दुर्वास आणि सुशांतसह सांगलीच्या इस्लामपूरमधील एक आरोपीचा सहभाग असल्याचे उघड झाले होते. रत्नागिरी शहर पोलिसांनी ही तपासाची माहिती जयगड पोलिसांकडे कळवल्यानंतर जयगड पोलिसांनी तातडीने सांगलीतील नीलेश भिंगार्डे या आरोपीला अटक केली.
सोमवारी या आरोपीला न्यायालयासमोर हजर करण्यात आले. न्यायालयाने या आरोपीला 8 सप्टेंबरपर्यंत पोलिस कोठडीत ठेवण्याचे आदेश दिले आहेत. पोलिसांच्यावतीने विशेष सहाय्यक सरकारी वकील निलांजन नाचणकर यांनी काम पाहिले.देशी बारमधील वेटर राकेश जंगम (28, रा. वाटद खंडाळा) हा 6 जुन 2024 च्या रात्री खंडाळा येथे जात असल्याचे सांगून घरातून बाहेर पडला. या वेटरला दुर्वास पाटील, विश्वास पवार आणि नीलेश भिंगार्डे यांनी कोल्हापूर येथून जावून येऊ या, असे सांगून कारमध्ये बसवले. या प्रवासादरम्यान या तिन्ही आरोपींनी त्या वेटरचा गळा आवळून ठार मारले आणि आंबा घाटातील दरीत फेकून दिल्याचे पोलिस तपासात उघड झाले आहे. या प्रकरणी अधिक तपास जयगड पोलिस स्थानकाचे सहाय्यक पोलिस निरीक्षक कुलदीप पाटील करत आहेत. याच दुर्वास पाटीलने आणखी दुसरा एक खून केल्याची कुणकुण असून या दिशेनेही तपास सुरु आहे. प्रेयसीच्या खुनप्रकरणी या आरोपींना रविवारी न्यायालयाने 8 सप्टेंबरपर्यंत पोलिस कस्टडी सुनावली असून वेटरच्या खूनप्रकरणी तिसर्याही आरोपीला 8 सप्टेंबरपर्यंत पोलिस कोठडी सुनावली आहे.
वेटर राकेश जंगम याचा मृतदेह शोधण्याचे काम सुरू आहे. त्यासाठी आवश्यक माहिती मिळण्यासाठी आरोपी नीलेश भिंगार्डेला पोलिस कोठडी देण्याची मागणी अॅड. नीलांजन नाचणकर यांनी न्यायालयाकडे केली. त्याचबरोबर या वेटरकडे असलेली बॅग त्याचबरोबर ज्या वाहनाने प्रवास झाला ती कार आणि इतर पुरावे शोधण्यासाठी पोलिस कोठडी देण्याची मागणी करण्यात आली. न्यायालयाने इस्लामपूरच्या या तिसर्या आरोपीलाही 8 सप्टेंबरपर्यंत पोलिस कोठडीत ठेवण्याचे आदेश दिले.
